DILI, 08 Jullu 2025 (TATOLI)–Ministériu Edukasaun (ME) liuhusi Superintendente Edukasaun Munisipiu Dili, koloka ona estudante 371 husi Eskola Rainha da Paz – Bebonuk bá Eskola Públika neen iha munisípiu Dili.
Superintendente Edukasaun Munisípiu Dili, Cesarina Correia Guterres, hateten, estudante 371 husi ensinu sekundáriu no báziku Eskola Rainha da Paz rejistradu iha Edukasaun Munisípiu Dili.
“Horisheik ami enkontru ho inan-aman no fundasaun, depois koloka ona bá skola sira. Ohin sira ba aprezenta-an iha Eskola Públika neʼebé sira bá,” Superintendente Edukasaun munisípiu Dili informa ba jornalista sira, iha Otél Novo Turismo, Bidau-Lesidere, Tersa ne’e.
Estudante sekundáriu kolokadu iha Eskola Ensinu Sekundáriu Jerál (ESJ) FINANTIL Ai-mutin, Eskola ESJ 10 Dezembru, no Ensinu Báziku koloka ba iha Ensinu Báziku Sentrál (EBC, sigla portugés) 30 Agostu, EBC 10 Dezembru Komoro, inklui koloka ba eskola filiál sira hanesan EBF Fomentu, EBF Ai-mutin no EBF 05 Komoro.
Notísia relevante : ME orienta ona halo transferénsia ba estudante Rainha da Paz
Iha fatin hanesan, Ministru Edukasaun interinu no atuál Sekretáriu Estadu Ensinu Sekundáriu Jerál no Tekniku Vokasionál, Domingos Lopes Lemos, hateten, dalan di’ak atu rezolve situasaun ne’e mak halo transferénsia ba estudante sira.
“Ita lakohi para labarik sira sai vítima ba ema seluk nia interrese, tanba Eskola Rainha da Paz ne’e Eskola Privada ida, ne’ebé nia estatutu fundadór sira sempre muda. Tanba ne’e, Ministériu Edukasaun orienta ba Edukasaun munisípiu Dili hodi foti asaun, nune’e halo ona transferénsia ba estudante sira atu sira bele frekuenta ezame períodu daruak,” nia akresenta.
Governante ne’e dehan, ME sei la taka Eskola Rainha da Paz tanba hanesan Eskola Privada, maibé Gabinete Avaliasaun Lisensiamentu Akreditasaun (GALA) sei halo notasaun kona-ba inkomprimentu ba rekezitu sira.
“Lei ne’ebé ME iha mak hotu-hotu tenke prense rekezitu normál ne’ebé GALA fó. Tanba ne’e mak ita asegura estudante sira no Servisu Edukasaun munisípiu Dili, husi sira ida-idak hakarak eskola ne’ebé ita sei lori ba iha ne’ebá,” nia katak.
Jornalista : Osória Marques
Editora : Julia Chatarina
