DILI, 09 Setembru 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, hateten MJDAK laiha dezintendementu ho Federasaun Futeból Timor-Leste (FFTL) maibé buat ne’ebé akontese ne’e, ema ida-idak mak seidauk intende nia servisu.
Notísia Relevante: MJDAK vs FFTL, Xanana: “Ha’u lahatene, ha’u hatene halo iha ne’ebá”
“Labele ko’alia dehan ami iha dezintendementu ho FFTL ne’e la loos. Ami laiha dezintendementu ho FFTL, maibé kubu ida-idak mak seidauk intende nia servisu. Ami Governu halo buat la loos maibé ho kuidadu. Buat hotu loos ona, fó ba sira asina hodi halo konstrusaun,” Ministru Nelyo hateten ba jornalista sira iha Timor Plaza, tersa ne’e.
Ministru ne’e hateten, kona-ba Estádiu Munisipál Dili no Estádiu foun ne’ebé atu konstrui iha Tasi-Tolu ne’e, nia parte simu ona ezbosu husi Federasaun Futeból Timor-Leste no tempu besik sei halo diskusaun hodi hakat ba konstrusaun bainhira parte rua konkorda malu ona.
“Ba ida-ne’e, ami simu ona ezbosu kooperasaun husi FFTL. Ba Estádiu Dili, ami haree ona, ami sei halo levantamentu. Halo tiha diskusaun mak depois mak ami sei bele aumenta iha ezbosu ne’e. Iha point balu ne’ebé ami hakarak, point balun ne’ebé ami haruka hasai, depois bolu sira mai haree no konkorda, ita bele asina akordu ona,” Ministru Nelyo hateten.
Nia esplika, Estádiu Munisipál Dili no Estádiu foun atu harii iha Tasi-Tolu ne’e sei iha prosesu levantamentu ho nune’e sei labele fó lai informasaun ba públiku.
“Buat ne’e sei iha faze levantamentu, entaun ha’u labele fó lai informasaun klaru, bainhira hotu ona ha’u sei fó fali informasaun, ita ko’alia kona-ba kampo rua Estádiu Dili no kampo multifunsaun Tasi-Tolu, tanba rua ne’e pakote ida, maibé depois mak sei fó fali informasaun,” nia dehan.
Nia hatutan, Estádiu foun ne’ebé atu konstrui iha Tasi-Tolu ne’e husi parte MJDAK simu krítika barak husi entidade hotu, ho nune’e Governu sei haree hodi halo diskusaun antes halo konstrusaun iha tempu besik.
Tanba ne’e, nia husu ba parte hotu atu hakmatek, tanba Governu sei haree no tetu hafoin foti desizaun ida-ne’ebé di’ak ba dezenvolvimentu ne’ebé sei realiza iha tempu besik, tanba desizaun hotu Konsellu Ministru aprova ona.
Notísia Relevante: FFTL-Igreja diskute fatin konstrusaun estádiu iha Tasi-Tolu
Jornalista : Hortencio Sanchez
Editór : Cancio Ximenes
