DILI, 08 Outubru 2025 (TATOLI)—Ministra Saúde (MS), Elia dos Reis Amaral, hateten Governu liuhusi Minsitériu Saúde planeia ona sei harii tan uma 10-resin ba médiku sira iha munisípiu sira iha tinan 2026.
“Tinan 2026, ita sei konstrui tan rezidénsia ba médiku sira hamutuk 10-resin iha Timor laran tomak. Bainhira buat hotu la’o loos ona ha’u sei informa fali ba ita-boot sira,” Ministra Elia hateten ba jornalista sira iha Palásiu Governu, kuarta ne’e.
Objetivu harii tan uma ba médiku sira iha munisípiu hotu atu fasilita profisionál saúde sira bele hela besik liután ba komunidade hodi halo atendementu ne’ebé di’ak ba populasaun sira.
Nia hatutan, iha tinan 2025, Governu liuhusi Ministériu Saúde harii Postu Saúde inklui ho uma hamutuk 16 ba médiku sira iha territóriu.
“Ita harii ona Postu Saúde no rezidénsia ba médiku sira iha tinan 2025 hamutuk 16. Ita atu ko’alia kona ba rezidénsia médiku, importante duni,” nia dehan.
Tuir Ministra Elia, ko’alia kona-ba rezidénsia ba médiku sira Governu presiza haree númeru populasaun kada munisípiu.
“Ita ko’alia kona-ba uma ba médiku sira, ita presiza haree lai. Ezemplu, hanesan munisípiu Baukau, populasaun hamutuk hira, kada aldeia sira-ne’e populasaun hira, ita presiza haree didi’ak,” nia hateten.
Programa Governu Konstitusionál da-sia (IX) mak hakbesik saúde ba komunidade hodi halo tratamentu ne’ebé dignu.
Antes ne’e, Diretór Jerál Politika Planeamentu Kooperasaun no Dezenvolvimentu Saúde, Narcisio Fernandes, hateten Governu halo ona konstrusaun ba Postu Saúde no rezidensia ba médiku sira ho fasilidade ne’ebé kompletu.
“Kontrusaun postu saúde sira iha munisípiu oioin hanesan Aileu, Ataúru, Maubisse, Likisa iha parte Loes nian ne’ebé inklui ho laboratóriu. Sira-ne’e pakote ona ho rezidénsia médiku,” nia dehan.
Jornalista : Felicidade Ximenes
Editór : Cancio Ximenes
