ATAÚRU 09 Novembru 2025 (TATOLI) – Elvina da Silva, nu’udar vendedora ida iha Beloi, Ataúru, husu ba Governu atu halo reabilitasaun ba portu entrada ba ilha referida, tanba kondisaun infraestrutura ne’e la favorável.
“Ha’u hakarak husu ba Governu atu hadi’a portu ida ne’e, tanba daudaun ne’e kondisaun la di’ak. Ita haree daudaun ne’e besi sira ferrujen hotu ona, lakleur tan bele tohar no sei prejudika ami nia rendimentu”, Elvina da Silva informa ba Tatoli iha Beloi, sábadu ne’e.
Nia hatutan rendimentu ne’ebé sira hetan ne’e barak liu iha loron sábadu, tanba iha vizita husi turista lokál no internasionál, tanba iha findesemana ne’e visitante ba barak.
“Husi segunda too sesta ami la fan iha ne’e [Beloi], só iha deit sábadu, entaun sira [vizitante] mai sosa ami nia katupa, ikan tunu, ikan maran no nuu, ami bele hetan liu $20”, nia haktuir.
Hatán ba preokupasaun ne’e, Prezidente Autoridade Administrativa Ataúru, Mateus Belo, hatete autoridade aprezenta ona proposta ba Governu sentrál dala rua, maibé seidauk hetan aprovasaun.
“Ami halo ona proposta ba Governu ho orsamentu $3.000 maibé seidauk hetan aprovasaun, daudaun [ami] halo fali proposta ba Konsellu Administrasaun Fundu Infraestrutura no hein katak sira bele ajuda”, Mateus Belo informa.
Dirijente ne’e mos haktuir, Governu sentrál nia resposta katak portu ne’e iha biodiversidade ho kualidade mundiál, bainhira konstrui portu foun sei fó impaktu ba rikusoin tasi nian, tanba ne’e presiza halo estudu, molok halo reabilitasaun.
Mateus Belo informa portu ne’e harii iha tempu okupasaun Indonézia nian, maibé too agora foin halo reabilitasaun dala ida.
Autoridade munisipál ne’e hatete bainhira ponte kais ne’e tohar sei prezudika movimentu no sei hapara atividade ekonómika iha Ataúru.
Notísia relasionada: Autoridade Ataúru destaka importánsia promove artezenatu lokál
Jornalista: Ivonia Silva
Editora: Isaura Lemos de Deus
