DILI, 30 Novembru 2025 (TATOLI)—Ekipa Basketból feto Ai-Leba One Shoot susesu halakon nia adversáriu ekipa feto Savarika ho valór 50-18 iha abertura kogu Desportivu Kampionatu Nasionál Basketból MJDAK Cup 2025.
Durante jogu, ekipa rua hatudu jogu ne’ebé atrai adeptu sira atu haree no soe bola ba-mai hodi buka oportunidade atu bele lansa shoot.
Jogu ne’e atrai tebes adeptu sira, tanba ekipa rua kuaze soe bola ba rede atu hanesan maibé ekipa Ai-Leba hatudu jogu ne’ebe di’ak, nune’e iha kuarter primeiru Ai-Leba one shoot prodús pontu neen (6) enkuantu Savarika prodús de’it pontu lima (5).
Kontinua ba kuarter segundu, Ai-Leba one shoot kontinua hatudu jogu produtivu hodi lansa shoot barak liu, nune’e aumenta pontu ba 20, enkuantu Savarika FC esforsu-aan hodi muda pontu ba hitu (7).
Iha kuarter terseiru, iha ne’ebé armada Ai-Leba one shoot halo hatake maka’as liu, nune’e kapitaun ekipa Nelia Bosco uza oportunidade hodi lansa shoot three point hodi aumenta kedan pontu ba 32, maibé armada Savarika halo esforsu hodi hasa’e pontu ba 12.
Hakat ba kuarter ikus, ekipa ne’ebé liderada husi kapitaun Nelia Bosco, hala’o jogu agresivu liután hodi prodús three point, ekipa Savarika halo esforsu maka’as maibé armada Ai-Leba taka metin nune’e defisil aumenta pontu.
Esforsu ne’ebé Savarika konsege aumenta pontu 18 enkuantu Ai-Leba one shoot aumenta pontu ba 50 no to’o jogu minutu 10 ramata vitoria ba Ai-Leba one shoot.
Kapitaun Ekipa Ai-Leba one shoot, Nelia Bosco, hateten nia parte sente orgullu tanba bele manán iha jogu primeiru .
“Ha’u sente orgullu tanba bele manán iha primeiru jogu ida-ne’e, no ami-nia adversáriu mós la’ós ohin mak ami hasoru primeiru maibé ami sempre hasoru malu ona iha eventu seluk. Nune’e bainhira hasoru sira, ami sente baibain ona,” nia hatetenba jornalista sira iha Ginájiu, Dili, sábadu kalan.
Nia subliña kona-ba jogu, sira ida-idak mai ho nia jogu ne’ebé diferensa entre jogadór ida-idak mós jogu la hanesan
“Ami jogador ida-idak mai ami-nia jogu ne’ebé la hanesan. Ezemplu, hanesan ha’u mai ho jogu ne’ebé mak shoot three point, maibé kolega sira sei bele mai ho shoot badak. No kompromete, sei nafatin hatudu jogu ne’ebé di’ak hasoru ekipa adversáriu sira iha jogu sira tuir mai,” nia dehan.
Jornalista : Osória Marques
Editór : Cancio Ximenes
