DILI, 19 Dezembru 2025 (TATOLI)—Diretór Jerál Institutu Nasionál Saúde Públika Timor-Leste, Nevio Sarmento husu komunidade iha munipsiu afetadu raiva nafatin halo prevensaun.
Notísia Relevante: 2024-2025, timoroan 18 mate iha HNGV tanba Raiva
“Ita husu nafatin ba populasaun sira iha fronteira nomos munispiu sira-ne’ebé afetadu raiva nafatin halo prevensaun,” Nevio Sarmento hateten ba jornalista sira, iha Kaikoli, ohin.
Nia hateten, ekipa vijilánsia nafatin fó informasaun nune’e banhira asu tata komunidade balun bele ba lalais fasilidade saúde ne’ebé mak besik hodi hetan tratamentu.
“Tanba ne’e, ami nafatin fó informasaun ba komunidade katak asu tata ne’e ba lalais fasilidade saúde hodi hetan vasina anti raiva,” nia esplika.
Nia dehan, Munisípiu hitu mak nafatin pozitivu ba raiva hanesan Ermera, Likisá, Kovalima, Manatutu Manufahi, Bobonaru no RAEOA.
“Estoke ba vasina anti raiva daudaun ne’e nafatin sufisiente iiha armajen sentral INFPM Kampung Alor, tanba estoke ne’e rasik hetan apoiu husi parseiru sira no mós ita-nia Governu rasik sosa liu husi UNDP,” nia dehan.
Notísia Relevante: Profisionál Saúde-Veterinária 500 partisipa formasaun kontrolu ba raiva iha TL
Jornalista : Felicidade Ximenes
Editór : Cancio Ximenes
