DILI, 08 Marsu 2026 (TATOLI)-Reuniaun Konsellu Ministru, kuarta ne’e, aprova projetu Rezolusaun Governu, ne’ebé aprezenta hosi Ministru Administrasaun Estatál, Tomás do Rosário Cabral, kona-ba orientasaun polítika jerál Governu nian kona-ba divizaun administrativa territóriu no rekoñesimentu ba suku no aldeia sira.
Sekretáriu Estadu Komunikasaun Sosiál, Expedito Loro Dias Ximenes hateten, rezolusaun Governu ida-ne’e ho objetivu prinsipál atu asegura estabilidade divizaun administrativa territóriu nian, atu nune’e bele garante koezaun territoriál, kontinuidade prestasaun servisu públiku ba populasaun, no preparasaun adekuada ba prosesu eleisaun prezidensiál iha tinan-2027.
Nune’e, Governu determina katak sei la kria Postu Administrativu foun no sei la rekoñese suku foun, haree ba impaktu ne’ebé bele mosu husi mudansa sira hanesan ne’e ba organizasaun aktu eleitorál ne’ebé prevee ona ba tinan-2027.
Rezolusaun Governu ne’e estabelese mós prienximentu obrigatóriu Fixa Família nian hosi membru hothotu hosi aldeia ida-idak iha suku ne’ebé pertense ba, atu nune’e bele reforsa mekanizmu ba identifikasaun no organizasaun komunidade lokál sira, no mós devér atu kumpre orientasaun sira husi xefe suku ida-idak.
Jornalista: Arminda Fonseca
Editór: Rafael Ximenes de A. Belo
