DILI, 04 Maiu 2026 (TATOLI)–Prezidente Tribunál Rekursu, Afonso Carmona, hateten, kona-ba rai iha área Praia dos Coqueiros, iha Aldeia Metin III, Suku Bebonuk Postu Administrativu Dom Aleixo, Munisípiu Dili daudaun iha hela prosesu nia laran no seidauk tránzitu ein-julgadu, tanba ne’e nia deside la fó komentáriu.
“Ha’u hanoin ha’u labele komentáriu desizaun Tribunál, tanba ne’e iha hela aktu prosesuál. Tanba ne’e, ha’u laiha kompeténsia atu komentáriu kona-ba disputa ne’e. Desizaun Tribunál nian iha kazu ida-ne’e ha’u labele komentáriu,” Afonso Carmona hato’o ba Jornalista sira iha ninia knaar fatin, Segunda ne’e.
Nia dehan, disputa rai ne’e iha hela prosesu nia laran, nune’e bele fó biban ba parte reu atu halo rekursu ordináriu no estraordináriu.
“Ita iha rekursu ordináriu, kuandu la aseita ita halo rekursu estráordinariu, ne’ebé laiha diskusaun no la interven, ida-ne’e Tribunál la konsidera ida-ne’e,” nia akresenta.
Notísia relevante : Disputa rai iha Praia dos Coqueiros, Xanana kestiona TR nia desizaun la afavór ba Lurdes Menezes
Kona-ba Primeiru-Ministru, Kay Rala Xanana Gusmão kestiona juíz sira-nia kapasidade foti desizaun, Prezidente Tribunál Rekursu argumenta, juíz sira foti desizaun tuir prinsípiu legalidade.
“Hau hanoin kona juíz sira-nia serbisu, buat hotu la’o tuir prinsípiu kontraditóriu. Ho ha’u-nia prezensa ita koko atu kapasita juíz sira atu nune’e labele kestiona sira-nia kapasidade. Ein prinsípiu juíz sira halo tuir regra. Konforme Parlamentu no Governu halo lei, maibé ein prinsípiu juíz sira foti desizaun ne’e tuir prinsípiu legalidade,” nia katak.
Antes ne’e, Lurdes Menezes, sidadaun ida-ne’ebé hela iha rai ida iha Aldeia Metin III, lamenta ho desizaun Tribunál Rekursu ne’ebé mak liuhusi akordaun iha loron 09 Janeiru 2026 afavór ba Mari Alkatiri hodi entrega nia rai.
Desizaun ne’e foti lian husi Juíz Plenária Tribunál Rekursu, ne’ebé kompostu husi Juiza Jacinta Correia da Costa (relatora), Deolindo dos Santos no Maria Natercia Gusmão Pereira, deside hodi altera tiha Tribunál Judisiál Primeira Instánsia Dili (TJPID) nia desizaun hodi afavór entrega Lurdes nia rai iha Bebonuk ba Mari Alkatiri.
Rai iha Bebonuk sai disputa tanba Mari Alkatiri halo kontestasaun ba Tribunál iha tinan 2009 hasoru Lurdes Menezes ba rai ne’ebé nia hela.
Jornalista : Natalino Costa
Editora : Julia Chatarina
