DILI, 14 Maiu 2026 (TATOLI)—Primeiru-Ministru, Kay Rala Xanana Gusmão, klarifika loloos ponte Bekora ne’e empreza finaliza ona, maibé tanba udan beibeik mak hodi fó impaktu ba obra refreida labele finaliza lalais.
“Ita atu halo estrada ida mak udan, udan ne’e, ita atu halo oinsá. Imi haree, ha’u ba tutuir saida mak halo ona, iha ponte Bekora ne’ebá mak la udan karik kompletu ona. Maibé tanba udan mak ita labele ansi, foin tau simente bane’e udan lori hotu tiha, ida-ne’e mós ha’u inforna ba Prezidente,” PM Xanana Gusmão hateten ba jornalista sira hafoin hala’o sorumutu ho Prezidenet Repúblika, José Ramos-Horta, iha Palásiu Prezidensiál Nicolau Lobato, Bairru Pite, kinta ne’e.
Binhira Fila husi partisipa Simeira ASEAN iha Filipina, nia parte tun kedas ba área Ponte Bekora hodi observa direta progresu konstrusaun projetu ne’ebé konsidera importante ba mobilidade no dezenvolvimentu infraestrutura iha kapital Dili.
Iha vizita refere, Xanana mós aproveita oportunidade atu ko’alia no fahe hanoin ho komunidade sira-ne’ebé hela iha área besik projetu.
Projetu Ponte Bekora espera atu sai solusaun importante fasilita ligasaun entre área sira iha Dili, liuliu ba utilizadór estrada sira-ne’ebé durante ne’e hasoru difikuldade movimentasaun iha oras movimentu aas.
Konstrusaun Ponte Foun Bekora-Maufelu, ho Tipu Bridge PCI Girder & Box Culvert, progresu to’o ona 35.12%.
Ponte Mau-Felu Bekora ho nia medida luan metru 24, nia luan pakkte dahuluk metru 20, iha pakote spam daruak okupa metru 10, no konstrui husi empreza Arquiris no Karya Timor-Leste ho durasaun tempu tinan ida (1), maibé tanba uda ponte ne’e sei atrazu to’o agora.
Jornalista : Hortêncio Sanchez
Editór : Cancio Ximenes
