BOBONARU, 19 Maiu 2026 (TATOLI)-Komunidade iha aldeia Halekou, suku Ritabou, postu administrativu Maliana, munisípiu Bobonaru, durante tinan barak hasoru problema estrada aat no falta postu saúde atu halo atendimentu ba komunidade ne’ebé moras.
Xefe Aldeia Halekou, Domingo Maulelo, informa katak iha tempu bailoro estrada sei di’ak, maibé kuandu udan difisíl tebes, tanba estrada nakonu ho tahu dodok.
“Ami presiza tebes postu saúde tanba suku Ritabou iha aldeia 12. Ami-nia aldeia Halekou, Korlului, Utedai no Moleana dook, entaun tenke harii duni postu saúde ida para komunidade ruma moras lalais bá fatin besik. Durante ne’e, tempu udan ami liga ba ambulánsia labele ba ho kestaun estrada la di’ak. Kona-ba postu saúde nia proposta ami hato’o tiha ona liuhusi Planu Dezenvolvimentu Aldeia, agora ami hein de’it”, nia dehan ba jornalista sira, ohin.
Notísia relevante: Komunidade husu IGEADI aterru rai-henek iha estrada Utedai-Halekou
Relasiona ho estrada, nia dehan iha tinan hirak liubá Instititu Jestaun Ekipamentu no Apoiu Dezenvolvimentu Infraestrutura (IGEADI) Brigada Maria Tapó halo ona normalizasaun, maibé tempu udan aat no difikulta movimentasaun transporte.
Tanba ne’e, Governu presiza tau-matan no estrada ne’e hanesan dalan públiku, sai alternativu bainhira populasaun sira hakarak viajen bá Dili ho distánsia ne’ebé besik no lais.
Rezidente Halekou, Abrão Espírito Santo, reforsa katak kondisaun estrada izola sira, liuliu iha tempu udan.
“Ami-nia aldeia ne’e tempu udan ambulánsia tama mós la di’ak, motór de’it mós la di’ak. Dalaruma ita monu tanba tahu maka’as, estrada la di’ak komesa husi ami-nia aldeia to’o Korluli. Kuandu moras ruma karreta la mai, ami tenke tau fiar ba malu hulan bá to’o Korluli foin sa’e karreta bá Maliana. Estrada ne’e importante tebes tanba liga husi Maliana mosu kedas iha Manduki, bá Dili ne’e besik loos ona”, nia haktuir.
Aleinde ne’e, komunidade mós levanta problema kona-ba falta bee-moos. “Bee iha, más sai mak uitoan de’it, ami kuru la to’o, husik de’it ona ba kuru fali iha dook. Ami kee rasik, balun hodi karosa bá kuru iha mota”, nia relata.
Tuir dadus 2026, aldeia Halekou iha xefe fámilia 157 no totál populasaun 726.
Notísia relevante: Governu normaliza irrigasaun Halekou fornese bee ba natar ektare 400
Jornalista: Sergio da Cruz
Editora: Maria Auxiliadora
