KOVALIMA, 21 Maiu 2026 (TATOLI)- Feto potensiál husi Suku Matai, Postu Administrativu Maucatar husu atu tuir formasaun kona-ba lideransa tanba partisaun Feto iha Lider Komunitária sei menus tebes.
“Ami feto potensiál presiza tebes tuir formasaun kona-bá lideransa,nune’e feto bele fiar aan atu kandidata nia aan ba xefe suku no seluk tan, tanba haree ba rezultadu hatudu feto sira menus sai lider komunitária”, Koordenadora Grupu Feto Kooperativa, Suku Matai, Dulce Constantina Amaral, informa ba TATOLI , iha Suku Matai.
Razaun feto Matai presiza tuir formasaun, atu iha futuru feto sira fiar aan avansa hodi kandidata sira-nia aan no partisipasaun feto iha suku Matai sei iha vida politika sei menus tanba kestaun kultura no sosiedade.
“Realidade hatudu iha tinan 2023 iha elisaun suku ne’e ami ni’an feto na’in-ida mak kandidata aan ba Xefe suku maibé nia la liu, tanba ne’e presiza tuir formasaun kona-bá lideransa”, nia husu.
Hatan ba kestaun ne’e, Administradór postu Maucatar-Kovalima, Laurentino de Jesus, hatete preokupasaun feto sira atu fasilita formasaun kona-bá lideransa sai hanesan programa prioridade no tau iha planu hodi bele realiza formasaun lideransa ba feto sira.
“Tempu ne’e, feto sira mós iha direitu atu kandidata aan no eleitu ba xefe suku, maibe tenke kapasita aan”, nia informa
Bazeia ba dadus Kovalima iha xefe Suku 30 husi númeru feto na’in-ida mak sai xefe suku,xefe suku 29 mesak mane de’it.
Jornalista: Celestina Teles
Editór: Florencio Miranda Ximenes
