DILI, 05 Juñu 2026 (TATOLI)—Diretór Nasionál Ensinu Sekundáriu Jerál Ministériu Edukasaun, Benjamin Fernandes, informa durante fulan-Maiu tinan-ne’e Diresaun Nasionál Ensinu Sekundáriu Jerál Ministériu Edukasaun legaliza diploma sekundáriu hamutuk 400.
Dirijente ne’e dehan kuantidade legaliza diploma depende ba nesesidade estudante nian, nune’e, kada loron barak liu legaliza 50 maibé kuandu iha vagatura entaun nia bele sa’e to’o 200.
“Ha’u hanoin iha fulan-Maiu tinan ida-ne’e ami legaliza ona diploma hamutuk 400-resin. Ami legaliza diploma la permanente ka la hanesan, tanba depende ba iha nesesidade ka ema ne’ebé maka atu konkorre vaga no balun ne’ebé mak atu kontinua sira-nia estudu iha rai-li’ur ka rai-laran,” nia dehan ba TATOLI iha nia kna’ar fatin, Kaikoli, Sesta ne’e.
Nia dehan durasaun legaliza ne’e kle’ur liu loron ida. Ezemplu ohin hatama no aban sira foti kedas, maibé kuandu urjente mak agora foti kedas.
“Diploma falsu sai dezafiu ida ba ami tanba ami tenke hein no konfirma sistema no eskola ne’ebé sira tau naran iha sira-nia diploma,” Benjamin tenik.
Kona-ba kritéria legaliza, diretór ne’e esplika tenke hatudu diploma orijinál hodi verifika no atu legaliza diploma urjente ka prosesu normál, hotu-hotu hatudu diploma orijinál.
Kona-ba sistema deteta diploma falsu, Benjamin haktuir, Diresaun Nasionál Ensinu Sekundáriu Jerál halo verifikasaun liuhosi pontu haat mak hanesan konfirmasaun ho sistema ne’ebé maihusi kurríkulu, scan ho marina, lista tuir izame ne’ebé arkivu hela no diploma iha sistema hanesan ka lae.
Totál legalizasaun diploma hosi Janeiru to’o Maiu tinan-ne’e hamutuk 2.800-resin.
Jornalista: Osória Marques
Editór: Xisto Freitas da Piedade
