DILI, 09 Juñu 2026 (TATOLI)–Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) klarifika kazu suspeitu na’in-rua hadau telemóvel iha dalan, ne’ebé rezulta Nadine Batista Ribeiro do Carmo ho idade 15 monu husi motorizada no mate iha Praia dos Coqueiros, iha Domingu (07/06).
Ekipa konjunta kaptura suspeitu nain-rua ho inisiál JACR no MZX iha área BTM III Tasi-Tolu, iha Postu Administrativu Dom Aleixo, Munisípiu Dili, iha Segunda (08/06) pur volta tuku 13:30.
Portavós Komandu Jerál PNTL, Superintendente Polísia João Belo, esplika, suspeitu na’in-rua iha loron-tolu liubá halo asaun foti naok motorizada iha Loja Gracia Kampung Baru nia kotuk. Nune’e, sira uza motorizada ne’ebé sira hadau husi ema hodi hala’o asaun hadau sasán iha Praia dos Coqueiros.
“Prosesu sira-ne’e ita sei akumula no aprezenta bá Tribunál, agora sei iha ami-nia liman hodi detein ba 72 oras, depois ami submete ba Tribunál,” nia akresenta.
Notísia relevante : PNTL detein suspeitu na’in-rua hadau telemóvel iha Praia dos Coqueiros
Kazu hadau telemóvel ne’e PNTL rejista ho NUC 0206/2026 PNSIK.
“Pasta ne’ebé mak sira hadau iha fatin akontesimentu no depois motór ne’ebé sira uza ne’e ami mós informa ba públiku atu ema ne’ebé sente nia motór lakon iha Loja Gracia nia kotuk iha loron-tolu liubá atu mai fó informasaun ba lala’ok nia motór lakon,” nia katak.
Kazu ne’e kontinua halo investigasaun no investigasaun sei la’o, nune’e parte PNTL seidauk bele fó sai detallu.
“Deklarasaun sira ne’ebé mak ita hetan husi sasin sira ita sei buka tuir nafatin atu hatene,” nia relata.
Superintendente Xefe Polísia, João Belo, hateten, PNTL kontinua husu Ministériu Públiku atu kontinua buka tuir ema ne’ebé envolve kazu ne’e tanba suspeitadu sira ne’e iha grupu tanba ne’e Polísia kontinua buka tuir.
Iha biban ne’e, João Belo husu ba inan-aman sira atu eduka oan sira respeita ema seluk.
“Husu mós ba inan-aman sira, se sente nunka sosa motór ruma ba nia oan sira maibé oan sira sai uza motór tenke buka tuir hodi hatene motór ne’e sé nia. Nune’e, ita labele halo toleránsia ba oan sira-nia asaun krime ne’ebé mak prejudika ema seluk nia direitu no ema seluk nia sasán,” nia fó-hanoin.
Jornalista : Natalino Costa
Editora : Julia Chatarina
