DILI, 09 Juñu 2026 (TATOLI)—Primeiru-Ministru, Kay Rala Xanana Gusmão, hateten
Timor-Leste hakarak aprende barak husi nasaun membru sira iha Association of Southeast Asian Nations (ASEAN), liuliu nasaun Vietname iha ninia dezenvolvimentu ekonomia nasionál, atu kontinua promove dezenvolvimentu ekonomia iha Timor-Leste.
Primeiru-Ministru, Kay Rala Xanana Gusmão, deklara assuntu ne’e durante vizita bá Parke Industriál Vietname-Singapura (VSIP) ne’ebé lokaliza iha Sidade Thuan An, Provínsia Binh Duong, ha lon Segunda (08/06).
“Nu’udár membru foun ASEAN nian ami aseita hala’o vizita iha Vietname atu aprende husi imi. Ha’u mai dahuluk Vietname iha tinan 2000 no agora ha’u mai fali haree mudansa boot tebes kompara ho situasaun iha tempu ne’ebá. Ho vizita ida-ne’e, ami hakarak estabelese kooperasaun entre país ASEAN sira. Ami presiza aprende husi imi, liuliu iha área ekonomia, agrikultura no agroindústria,” PM Xanana hateten iha reuniaun ho responsável sira husi VSIP.
Primeiru-Ministru mós manifesta interese atu estabelese kooperasaun ho VSIP, inklui oportunidade ba foinsa’e timoroan sira atu hetan formasaun no esperiénsia iha setór industriál. Asuntu ne’e sei sai parte husi diskusaun iha fórun ASEAN sira iha futuru.
Iha enkontru ne’e, Vise-Prezidente Provínsia Bac Ninh, Le Xuan Loi, destaka relasaun amizade ne’ebé kle’ur ona entre Vietname ho Timor-Leste ne’ebé lembra katak Vietname nu’udár nasaun ida-ne’ebé rekoñese Frente Revolusionária ba Timor-Leste Independente (FRETILIN) iha Setembru 1975, no nasaun rua ne’e estabelese relasaun diplomátika ofisiál iha 28 Jullu 2002.
Le Xuan Loi hateten, relasaun entre Vietname ho Timor-Leste kontinua dezenvolve relasaun di’ak durante tinan hirak liu-bá, liu-hosi kontaktu polítiku no diplomátiku iha nível aas, inklui iha eventu no enkontru ASEAN sira.
Ho vizita Primeiru-Ministru Xanana Gusmão bá Bac Ninh, nia espera katak sei sai marka importante ida hodi haburas kooperasaun entre provínsia ne’e ho parseiru sira iha Timor-Leste, liu-liu iha área indústria, investimentu no empregu.
“Ha’u espera katak delegasaun Timor-Leste bele hetan informasaun barak kona-bá dezenvolvimentu zona industriál sira iha Bac Ninh no estuda posibilidade atu adapta modelu hanesan ne’e iha Timor-Leste. Fulan ida liubá, ami mós diskute ho Ministru Empregu Timor-Leste no Embaixadór Timor-Leste iha Vietname kona-bá oportunidade atu lori traballadór Timoroan sira mai servisu iha parke industriál sira iha provínsia ne’e,” nia atualiza.
Le Xuan Loi konsidera lideransa PM Xanana bele lori relasaun bilaterál entre nasaun rua ne’e bá nivel aas liután no kontribui ba pás, estabilidade no dezenvolvimentu iha rejiaun Sudeste Aziátiku.
Enkuantu Parke Industriál Vietname-Singapura (VSIP) konsideradu hanesan símbolu relasaun metin no kooperasaun ekonómika entre Vietname ho Singapura. Empreza ne’e harii liuhusi parseria entre Becamex IDC Corporation hosi Vietname no Sembcorp Development husi Singapura ho apoiu husi Governu nasaun rua nian.
Ekipa TATOLI
