BAUCAU, 07 marsu 2024 (TATOLI) – Bee Timor-Leste, Empreza Publiku (BTL,ep) hahú estabelese sistema dijitalizasaun hanesan dadus kliente no ekipamentu ho fazeadamente.
Diretór Nasionál Admistrasaun no Finansas BTL,ep, Sidonio da Costa Freitas, esplika, sistema dijitalizasaun refere hahú dahuluk ho sistema administrasaun no finansa ne’ebé remata ona no fulan-ne’e kontinua ho sistema rejista kliente.
“Agora selu de’it iha balkaun iha zona hela ba, labele ba selu iha fatin seluk maibé bainhira ami dijitaliza sistema bele selu iha-ne’ebé deit,” Diretór Nasionál Administrasaun no Finansa BTL,ep hateten iha Vila Nova, kinta ne’e.
Prosesu dijitaliza sistema refere hanaran sistema manajementu internasionál (IMF, sigla inglés) ne’ebé komesa ho rejistu kliente, dadus konsumedór no sistema pagamentu ne’ebé sei uza aplikasaun liuhosi telemovel tanba sei direita ho banku nune’e bele transferénsia direita ba konta BTL,ep nian.
Alende ne’e, sei dijitaliza mós ekipamentu liuhosi maneira armazeinamentu hanesan rejistu numéru seri nune’e bainhira utiliza ba kanalizasaun bee-moos kuandu hasoru problema bele iha ona informasaun ne’ebé deteta automátika.
“Sistema ne’e atu fasilita jestaun nune’e hafasil koordenasaun iha terrenu,” Sidonio Freitas akresenta.
BTL,ep rasik seidauk iha tarjeitu atu finaliza sistema dijitalizasaun tanba presija fazeadamente hanesan rejistu kliente hosi nasionál to’o munisípiu, sistema patrimóniu ka lojístka no ikus mak jestaun projeitu.
Husu kooperasaun hosi autoridade Baucau
Bee Timor-Leste, empreza publiku (BTL,ep) husu autoridade munisipál to’o suku atu serbisu hamutuk hodi koopera liuliu sosializa informasaun kona-ba atividade no programa.
Diretór Administrasaun no Finansa Bee Timor-Leste, Empreza Publiku (BTL,ep), Sidonio da Costa Freitas, esplika, prezensa ekipa iha Baucau atu sosializa kona-ba atividade no programa BTL,ep nian hanesan fahe informasaun implementasaun projetu inklui maneira selu tarefa kliente sira ba autoridade munisipál, postu no suku sira.
“Ami hato’o atu oinsá koordena no kolabora hamutuk ho autoridade sira hosi munisípiu to’o suku,” Diretór Nasionál Administrasaun no Finansa BTL,ep hateten.
Objetivu serbisu hamutuk ne’e atu husu ajuda autoridade sira tau mos atensaun ba projetu lima BTL,ep nian iha postu administrativu haat hanesan kanalizasaun bee-moos iha postu Laga, Venilale, Baguia no Quelicai.
Projetu kanaliza bee-mos iha postu Vemasse finaliza ona, postu Venilale presiza aumenta asesores nune’e hein distribusaun, Laga sei finalzia iha trimestrál daruak tanba presiza muda item tuir terrenu, postu Baguia no Quelicai mak hadoru dezafiu klima.
Nia husu apoia pagamentu tarefa hanesan halo esplikasaun ba komunidade nu’udar kliente nune’e iha konsiénsia selu tuir metru kontadór bainhira bee-moos hahú kanaliza ona tuir uma-kain.
“Ami sei koko tau metru atu komunidade selu tuir bee ne’ebé sira uza,” Sidonio Freitas akresenta.
BTL,ep mos husu atu autoridade lokál informa ba komunidade atu konserva bee-matan liuliu ho impaktu hosi mudansa klimátika no ai-horis ne’ebé tesi arbiru hosi komunidade sei fó ameasa ba bee-matan.
Jornalista : Natalino Belo
Editór : Evaristo Soares Martins
