DILI, 11 jullu 2022 (TATOLI)— Diretór Tékniku Federasaun Futeból Timor-Leste (FFTL), Gaspar Quintão, hateten ekipa Timor-Leste derrota dala rua iha kopa ASEAN Football Federation (AFF) U-19 2022 tanba falla iha liña kotuk ka defeza ne’ebé la halo vizilánsia másima.
“Ita derrota dala rua iha jogu AFF ne’e sala iha liña kotuk tanba avansadu ho liña klaran halo jogu ne’ebé di’ak tebes, maibé liña kotuk ka defeza karuk ho loos rua ne’e sa’e liu ba oin tun tarde, entaun ema aproveita espesu ne’ebé mamuk, ema hatama kedan golu,” Diretór Tékniku ne’e ba jornalista-sira iha edifísiu FFTL, segunda ne’e.
Notísia relevante: Kopa AFF U-19, TL “dere” Singapura 1-0
Alende ne’e, komunikasaun entre guarda rede no defeza ladun másimu hodi kontribui mós ba jogadór adversáriu lansa golu.
Maibé, relatóriu hotu kona-ba jogu fallansu ne’e sei relata hosi treinadór kona-ba razaun hosi Timor-Leste la konsege konkista vitória hodi ultrapasa hosi faze final.
Durante jogu ne’e Timor-Leste tama iha grupu B hamutuk ho Malazia, Laos, Kamboja no Singapura.
Ekipa Lafaek ne’ebé lidera hosi treinadór Timoroan, Eduardo Pereira, jogu dala tolu ona ne’ebé mánan dala ida kontra Singapura ho eskore 1-0, no derrota dala rua, hanesan lakon ho 0-2 ho Laos no lakon 3-4 ho Malázia.
Maski, jogu ikus ho Kamboja seidauk akontese, maibé bainhira iha jogu ne’e Timor-Leste manán mós la avansa ba semi-finál tanba pontu mantein tolu no ekipa seluk pontu neen ona.
Ekipa ne’ebé kandidatu forte avansa ba semi-final iha grupu B mak hanesan, Laos no Malázia.
Notísia relevante: Selesaun Nasionál U-19 arranka bá Indonézia hodi partisipa kopa AFF 2022
Jornalista: Hortencio Sanchez
Editór : Florencio Miranda Ximenes
