OÉ-CUSSE, 20 Jullu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Saúde, organiza serimónia entrega serbisu husi Diretór sesante Servisu Nasionál Ambulánsia Emerjénsia Médika, Institutu Públiku (SNAEM, I.P), Aniceto de Jesus Pereira, ba nia susesór Fernando Caet hodi asaume knaar ba mandatu tinan haat, entre 2024 no 2028.
Sekretáriu Rejionál ba Asuntu Saúde, Luís de Jesus Neno, hateten tuir Lei Funsaun Públika, kargu diretór no xefe departamentu hotu-hotu ho nia durasaun tinan rua no durante assume knaar mak halo avaliasaun dezempeñu no nia rezultadu di’ak bele kontinua tinan rua tan.
Notísia relevante: Autoridade ofisializa kompañia tolu apoia serbisu iha fasilidade saúde Oé-Cusse
“Lei Funsaun Públika númeru 08/2004 hateten katak kargu ne’e ba ema hotu tantu feto no mane. Durasaun kargu ne’e ita asume tinan rua de’it. Avaliasaun dezempeñu karik di’ak bele kontinua tinan rua hodi kompleta tinan haat. Liu tiha ne’e, persiza fó fali ba ema seluk,” Luís Neno dehan iha ámbitu serimónia ne’e.
Nia husu ba profisionál saúde sira atu hatudu prestasaun serbisu ho hatudu étika profisionál hodi atende komunidade sira ho domin.
“Ita saúde ne’e ida de’it, Governu atu troka malu, maibé saúde ida de’it, serbí povu no serbí nasaun. Hakarak ka lakohi povu iha problema saúde, ita iha obrigasaun tenke atende ho domin, hatudu oin midár, labele atende ho hirus, tanba ne’e étika profisionál saúde hatuur ona katak, tenke atende povu ho domin, tanba sira persiza saúde maka mai husu ita-nia apoiu”, nia fó hanoin.
Notísia relevante: Sekretáriu Rejionál Saúde Oé-Cusse la tolera pesoál saúde abandona serbisu
Diretór foun SANEM, Fernando Caet, agradese ba konfiansa no durante mandatu sei serbisu hamutuk atu hadi’a serbisu emerjénsia iha Oé-Cusse.
“Ha’u simu kargu ne’e la’ós oportunidade maibé responsabilidade, tan ne’e ha’u husu mai ita serbisu hamutuk, liuliu serbisu ambulánsia nian hahú husi médiku, motorista, enfermeiru no parteira sira atu koopera tanba ne’e mak xave atu rezolve serbisu ambulánsia Oé-Cusse”, nia dehan.
Iha sorin seluk, diretór sesante, Aniceto de Jesus Pereira, promete katak sei apoia líder foun SNAEM. “Ha’u agradese ba konfiansa durante mandatu entre 2019 no 2024 ne’e. Ha’u sei apoia serbisu ambulánsia nian, nune’e bele mellora ita-nia serbisu saúde Oé-Cusse”, nia realsa.
SNAEM Oé-Cusse iha totál funsionáriu hamutuk na’in-17, kompostu husi motorista na’in-lima no restante médiku no enfermeiru sira.
Jornalista: Abílio Elo Nini
Editora: Maria Auxiliadora
