LIKISA, 24 Maiu 2026 (TATOLI)-Prezidente Repúblika, José Ramos-Horta, ohin distribui apoiu nesesidades bázika ba família kbi’it la’ek hamutuk uma-ka’in 100 iha suku Leorema, postu administrativu Bazartete, Munisípiu Likisa.
Programa apoiu sosiál husi Xefe Estadu ne’e hanaran ‘’Pakote Domin’’ ne’ebé fahe ba família kbi’it la’ek sira, ba domingu ne’e, Prezidente Repúblika ho komitiva distribui iha aldeia Baura ho objetivu atu hakmaan ekonomia komunidade sira ne’ebé sei moris iha liña ki’ak.
Sasán hirak ne’e maka foos, mina, manu-tolun, kadernu ba estudante sira, inklui bola no farda ba joven sira atu prátika desportu.
Premiadu nobél ba páz ne’e husu ba autoridade komunitária atu identifika família kb’it la’ek sira ne’ebé oras ne’e sei moris iha uma aat atu relata dadus ne’e ba ekipa Prezidensia Repúblika hodi hetan apoiu uma.
“Iha buat ruma tan ne’ebé presiza família ruma ne’ebé uma ladi’ak, kondisaun ladi’ak, aat loos, xefe aldeia no xefe suku fó hatene mai Prezidénsia nune’e bele haree sei bele ajuda ka la’e,” dehan PR Horta.
Iha okaziaun ne’e Xefe Estadu mós lori médiku na’in rua hodi fó tratamentu saúde ba komunidade sira ne’ebé moras maibé seidauk bá halo tratamentu saúde iha postu saúde no sentru saúde sira.
Iha fatin hanesan Xefe Suku Leorema, Damião Manuel Gonsalves, esklarese katak apoiu ne’e distribui ba família uma-ka’in 100 husi aldeia 10, no kada aldeia benefisiárius na’in 10.
‘’Kritériu ba hili benefisiáriu sira bazeia duni ba tipu vulnerabilidade, hanesan inan feton sira ne’ebé faluk sira, katuas no ferik ho idade avansadu ne’ebé laiha ona kbi’it hodi halo movimentu no servisu ikusliu maka komunidade ne’ebé sofre hela moras króniku no defisiénsia,’’ nia hateten.
Kona-bá ekipamentu desportu ne’ebé hetan apoiu husi Xefe Estadu, sei jere ho didi’ak nune’e bele promove joven sira ne’ebé iha talent iha área desportu nian.
Reprezentante benefisiáriu, Domingas Gonsalves hosi Aldeia Gugumera, orgullu no apresia ho apoiu husi Prezidente Repúblika tanba to’o diretamente iha sira-nia suku hodi observa no haree besik liután komunidade nia moris.
“Nesidade sira ne’ebé ami atu simu la barak maibé ida ne’e naton ba ami no nafatin husu agradese ba Nai Prezidete tanba loron ida ohin ita mós selebra ita-nia Éroi Sudozu Nicolau Lobato nia loron moris nian,” nia apresia.
Jornalista : Francisco da Costa Sony
Editór : Florencio Miranda Ximenes
