DILI, 24 Jullu 2025 (TATOLI) – Tailándia dada nia embaixadór hosi Phnom Penh no espulsa embaixadór Kamboja nian hafoin akontesimentu mina terrestre iha fronteira Tailándia-Kamboja nian ne’ebé hakanek soldadu tailandés sira.
“Ami bolu hikas embaixadór tailandés iha Kamboja no hasai embaixadór kamboja hosi Tailándia. Nune’e mós, ami sei haree fali nível hosi relasaun diplomátiku sira ho Kamboja,” Primeiru Ministru Interinu Tailandés, Phumtham Wechayachai, hasai deklarasaun iha loron-kuarta ne’e, ne’ebé Ajénsia TATOLI asesa husi Antaranews.
Desizaun ne’e mosu hafoin soldadu tailandés na’in-lima hetan kanek, inklui ida-ne’ebé nia ain tesi, iha esplozaun ne’ebé provoka hosi mina PMN-2 ne’ebé halo hosi soviétika iha fronteira disputa Tailándia-Kamboja iha loron-kuarta ne’e.
Insidente ne’e hanesan segundu iha loron ualu nia laran, hafoin militár tailandés na’in-tolu hetan kanek tanba mina ne’ebé hanesan iha loron 16 fulan-jullu. Husi sira na’in-tolu ne’e ida mós lakon ain ida.
Embaixadór tailandés bolu fali ba konsulta sira iha inísiu fulan-Juñu, nune’e retirada ne’e reflete pozisaun diplomátiku ofisiál atuál Tailándia nian.
Tailándia protesta ona ida-ne’e ba Japaun, ne’ebé agora daudaun prezide reuniaun ida hosi nasaun sira-ne’ebé partisipa iha Konvensaun Ottawa, ne’ebé bandu produsaun, estoke no utilizasaun hosi mina antipesoál sira.
Relatóriu ofisiál ne’ebé aprezenta hosi Tailándia mós akuza Kamboja hodi kuda mina antipesoál iha teritóriu tailandés.
Prosesu inspesaun no desminasaun Tailándia nian revela mina foun PMN-2 ne’ebé kuda iha teritóriu Tailándia maizumenus metru 50-100 hosi markadór fronteira ho Kamboja. Tailándia afirma katak iha probabilidade boot katak mina sira-ne’e kuda iha fulan rua ikus ne’e.
TATOLI
