BOBONARU, 18 Fevreiru 2025 (TATOLI)—Udan boot durante ne’e, kareta ambulánsia husi Sentru Saúde Komunitária (SSK) postu administrativu Bobonaro, munisípiu Bobonaru labele halo operasaun ba tula pasiente sira iha suku lima hansan Molop, Lour, Sibuni, Leber no Ai-Asa tanba mota boot no kondisaun estrada la permite.
Xefe SSK postu administrativu Bobonaru, Cesaltino Maia, konfirma SSK Bobonaru nia área kobertura kobre suku sia (9) no entre suku hirak ne’e, iha suku haat (4) hansan Bobonaru villa, Malilait, Oe-leu no suku Tapo mak kareta Ambulansia bele ba tula pasiente kualker tempu tanba la hakur mota no kondisaun estrada mós di’ak.
Notísia Relevante: Governu inaugura rezidénsia pesoál saúde iha Bobonaro
“Iha suku lima ne’e, iha aldeia ida de’it, aldeia seluk hanesan Oalgomo, Laho, Mazop, Odelgomo no Aisal-gusun kareta labele ultrapasa, tanba mota kle’an no dalan mós ladi’ak tanba taho nakonu. Ita hasoru buat barak, ita haree de’it dalan husi Maliana mai Bobonaru de’it mós araska tiha ona satán atu ba aldeia. Aaat liután, hanesan kazu horbainrua iha Sibuni, iha tuku 10h00 dadeer sira telefone ha’u, hau dehan karreta bele ba maibé kondisaun dalan ladi’ak, se bele imi leba tun mai ita hein malu iha mota Oalgomo, tanba hakat ba labele, mota tun, mota laran fatuk mak nakonu no karreta labele ultrapasa. Ikus, ema dehan, hau mak la autoriza karreta tula pasiente,” Nia informa ba Agência Tatoli iha nia kna’ar fatin, tersa ne’e
Nia dehan, médiku no imfermeira sira-ne’ebé kolokadu iha postu saúde, kontinua halo atendimentu normál maibé bainhira akontese kazu emerjénsía ruma meiu ne’ebé di’ak atu salva pasiente nia vida mak familia tenke organiza malu hulan pasiente mai to’o dalan ne’ebé karreta ambulánsia bele asesu, hafoin transporta ba fasilidade saúde hodi hetan tulun husi médiku sira.
“Ha’u fó hanoin ba komunidade karik iha ema moras, ita servisu hamutuk, ita haree kondisaun. Karik, ami ba labele, entaun tenke lori mai. Se ita haree ladi’ak-liu mak transfere ba Maliana. Kuandu, iha ne’e kareta aat mós ami liga ba diretór Saúde Munisipál, karreta iha Maliana mak bele mai tula iha Bobonaru,” nia hateten.
Entretantu, Komunidade Odelgomo, António de Jesus, husu ba Ministériu kompetente atu tau prioridade hodi rezolve problema ne’e iha períodu tuir mai.
Nia haktuir, problema ne’e líder komunitária no autoridade postu sira hato’o beibeik ona ba Governu maibé to’o agora seidauk iha rezultadu.
“Ami tinan-tinan ne’e, kuandu udan ona book-aan hotu araska, mota boot, dalan mós ladi’ak, moras ruma ka ema atu partus lori ba Bobonaru mós ladi’ak. Dalaruma iha uma de’it, hein to’o bele mate iha fatin, tanba ponte laiha, mota mós boot,” nia dehan.
Enkuantu, Sentru Saúde postu Administrativu Bobonaru nia sanak hamutuk haat mak hanesan postu saúde Lour, Molop, Sibuni no Leber.
Notísia Relevante: Servisu Saúde Bobonaru klarifika ambulánsia lebele tula pasiente Casilda iha Sibuni
Jornalista : Sérgio da Cruz
Editór : Cancio Ximenes
