OÉ-CUSSE, 14 setembru 2022 (TATOLI) – Inan Tereza Beno Falo (27) hosi suku Ban-Afi, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), partu bebé feto ida iha ró Berlin Ramelau laran, bainhira hala’o viajén hosi Dili ba Oé-Cusse iha tersa kalan, 12 setembru, iha tuku 21.5.
Liuhosi pájina ofisiál ZEESM katak, bainhira Tereza Beno Falo (27) partu hetan asisténsia saúde hosi profisionál saúde na’in-ha’at, tanba viajen hamutuk iha ró laran hosi Dili ba Oé-Cusse.
“Partu iha ró laran, sei iha mumentu viajen iha tasi laran, iha inan feto isin-rua ida sente atu partu maka doutór Januário Soares no doutora Manuela Salem, hamutuk ho infermeira Octaviana no Anabela Nunes, ho fuan boot ajuda inan isin-rua ne’e konsege partu iha ró ahi Berlin Ramelau ho kondisaun di’ak,” refere nota imprensa ne’ebé Agência Tatoli asesu hosi ZEEM-RAEOA, kuarta ne’e.
Iha momentu ró arranka hosi Dili ba RAEOA iha tasi klaran, kuaze tuku 08:56 oras Timor-Leste, pesoál saúde sira-ne´e hetan informasaun hosi ekipa ró ahi Berlin Ramelau nian, informa katak pasiénte feto ida, naran Teresa Beno Falo (27) hosi suku Ban-Afi, sub-rejiaun Nítibe sente knotak moras no kabun moras, nune’e mós foer sai ona hosi dalan moris nian.
“Entaun iha momentu ne’e pesoál saúde na’in-haat ne’e halo kedas intervensaun ba pasiente inan isin rua ne’e hodi koko sinál-sinál mak hanesan: TTV 131/83mmHg, Pulse:92X/menutu no hala’o ezaminasaun ba inan isin-rua ne’e nia kabun, fundu uteri hodi aproxima loloos hodi hatene klaru katak partu ona ka sei lori tempu no sá oras maka bele partu,” sita iha nota imprensa ne’e.
Médiku sira hala’o observasaun durante oras ida, iha tuku 21.50 OTL, konsege partu duni bebé feto ida, ho kondisaun partu normál no plasenta (kaan) mós sai normál, nune’e bainhira partu tiha, pesoál saúde sira kontinua hala’o nafatin akompanãmentu no ezaminasaun.
Nune’e durante iha prosesu viajen hosi Dili ba Oé-Cusse, profisionál saúde na’in-haat, kontinua observa ba inan ho bebé nia kondisaun, durante kalan tomak ne’e to’o dadeersan inan no bébe nia kondisaun di’ak hotu, tanba inan fó susu di’ak ho kondisaun normál.
“Pesoál saúde sira nafatin hamaluk inan no bebé ne’e to’o dadeersan ró atraka iha Portu Iwao Kitahara, Mahata no kontaktu kedas ba ekipa ambulánsia iha Hospital Referál Oé-Cusse hodi transporta kedas sira ba iha ospitál hodi hetan asisténsia saúde tuir polítika fasilidade saúde nian,” nota imprensa ne’e informa.
Jornalista: Abílio Elo Nini
Editór: Evaristo Soares Martins
