DILI, 09 Janeiru 2026 (TATOLI)–Ministériu Solidariedade Sosiál no Inkluzaun (MSSI) aloka ona osan rihun $110 iha tinan ida ne’e ba programa Apoiu Pontuál Defisiénsia Vulneravel, programa Negósiu Sustentavel ba Ema ho Defisiénsia no programa Apoiu Pontuál Vulneravel ho Moras Mentál.
Diretór Nasionál ba Ema ho Defisiénsia MSSI, Domingos Hendriques Maia hateten orsamentu ba Apoiu Pontuál Defisiénsia Vulneravel hamutuk rihun $40, ba Negósiu Sustentavel ba Ema ho Defisiénsia rihun $40 no programa Apoiu Pontuál Vulneravel ho Moras Mentál $30.000.
“Durante tinan tolu nia laran, Ministériu Solidariedade Sosiál no Inkluzaun garante ona orsamentu ba programa tolu ne’e. Ne’ebé, hahú iha tinan 2024 no kontinua to’o ohin loron, hodi mantein no apoiu atividade sira ho maluk defisiénsia sira,” nia dehan ba TATOLI iha nia kna’ar fatin, Kaikoli, Sesta ne’e.
Nia dehan molok atu identifika benefisiáriu sira, MSSI servisu hamutuk ho sentru MSSI iha munisípiu sira hodi halo avaliasaun ba benefisiáriu sira, hafoin relata relatóriu ba Diresaun Nasionál Ema ho Defisiénsia, hafoin halo analiza ba sira-nia orsamentu.
Maia esplika orsamentu ba negósiu sustentavel ne’e depende ba proposta, maibé montante inisiál entre $500-$2.000. Iha tinan 2025, programa negósiu sustentavel oioin hanesan iha kioske, ofisina balun, karpintária, produsaun tofu no tempe no hadi’a telefone.
Diretór akresenta iha 2024, MSSI aloka orsamentu hamutuk $20.000 ba benefisiáriu 50, ne’ebé hodi apoia de’it programa Apoiu ba Ema Vulneravel ho Defisiénsia, no iha tinan 2025 MSSI aloka osan $42.000 ba programa Negósiu Sustentavel hodi benefísia benefisiáriu 44 iha nivel territoriál no mós ba benefisiáriu 14 ho ema vulneravel sira Programa Apoiu ba Defisiénsia sira.
“Depoiz 2026 ita sei fó oportunidade ba ema ho defisiénsia sira-ne’ebé iha kapasidade atu hakbiit no haforsa-an iha ekonomia, maibé la’ós hanesan ema sira-ne’ebé hetan benefísiu iha tinan kotuk,” nia informa.
Jornalista: Osória Marques
Editór: Xisto Freitas da Piedade
