DILI, (TATOLI) – Prezidente Komisaun Funsaun Públika (KFP), Faustino Cardoso, ho ekipa, ohin kontinua aprezenta ba Primeiru-Ministru, Taur Matan Ruak, kona-ba planu promosaun grau ba funsionáriu públiku hamutuk 1.455 prense rekézitu hosi KFP hodi tuir promosaun iha tempu besik.
Iha diskusaun ho xefe governu, KFP aprezenta pedidu atu halo alterasaun ba definisaun vaga ba promosaun, tanba artigu balun sentidu la klaru hodi hamosu intrepretasaun diferensia entre gabinete Primeiru-Ministru ho KFP.
“Pareser atu halo alterasaun ba dekretu lei númeru 1/2018 liuliu artigu 7 atu define loloos no momós ne’ebé liga ho porsentu 10 hosi vaga alvu promosaun ka ou hosi númeru kandidatu konkorente sira ba vaga ida”, dehan nia ba jornalista sira hafoin sorumutu.
Nia hatutan: “Ha’u fó ezemplu porsentu 10 ne’e maihosi vaga grau A ka grau B ka grau B atu ba iha grau ne’e maka la hanesan, tanba ne’e dalan maka tenke halo alterasaun”.
Faustino Cardoso haktuir Primeiru-Ministru fó kedas orientasaun ba ninia gabinete atu aselera servisu hodi halo alterasaun ba dekretu governu ne’e iha konsellu ministru.
Komisaun oras ne’e halo ona preparasaun téknika ba konkorsu eletróniku ba funsionáriu rihun ida resin ne’e hodi tuir promosaun.
Maibé, Prezidente KFP ne’e hatete sei aselera prosesu promosaun atu bele enkaixa iha jornada orsamentu 2020 iha ministériu ida-idak depois funsionáriu hirak ne’e pasa iha promosaun grau.
Alende ne’e, nia aprezenta mós ba xefe ezekutivu kona-ba proposta lei planeamentu forsa traballu iha setór públiku ne’ebé KFP prepara hodi entrega ba governu iha tempu badak.
“Durante ne’e rekrutamentu sira ne’e la bazeia ba planeamentu ida di’ak, la bazea ba análiza nesesidade forsa traballu maibé bazea de’it ba osan hodi rekruta barak, maibé la tuir nesesidade, tanba ne’e dekretu lei ne’e atu define didiak bainhira iha instituisaun ida atu halo rekrutamentu tenke bazea ba analiza nesesidade instituisaun”, realsa tan.
Entretantu, totál funsionáriu públika 33.000 resin no tau hamutuk ho funsionáriu kazuál sira hamutuk rihun 40.000, tanba kazuál sira laiha baze dadus iha KFP, maibé iha payroll ne’ebé halo pagamentu salariál ba sira.
Jornalista: Agapito dos Santos
Editora: Rita Almeida
