DILI, 16 marsu 2020 (TATOLI)–Xefe Kaza Sivíl Prezidénsia Repúblika, Francisco Maria de Vasconcelos, agradese ba Ministériu Obras Públika (MOP) ho entidade hotu ne’ebé fó apoiu direta no indireta hodi hamoos área Palásiu Prezidensiál.
“Iha oportunidade ida ne’e ami hakarak atu hato’o ami nia agradesimentu ba parte Ministériu Obras Publika (MOP), ne’ebé mak fó apoiu, bombeiru sira mai rega, no mós setór privadu HAKSOLOK, Lda, ne’ebé desde kedan hahú sira mai fó apoiu hodi hamoos,” dehan Xefe Kaza Sivíl, Francisco Maria de Vasconcelos, hafoin akompaña entidade hirak ne’e hala’o limpeza iha área Palásiu PR Bairru Pité, Dili, segunda (16/3/2020).
Aleinde ne’e, Xefe Kaza Sivil ne’e mós hakarak hato’o obrigadu ua’in ba populasaun sira ne’ebé mak besik iha Palásiu Prezidente ne’e, mezmu sira la mai iha ne’e maibé sira halo esforsu atu taka bee nune’e bee la bele tama mai iha ne’e.
Xefe Kaza Sivíl ne’e mós konsidera katak, inundasaun iha tinan ida ne’e, makaas liu kompara ho tinan sira ne’ebé liu tiha ona. Tanba ne’e, nia dehan, sira-nia previzaun loron rua tan hanesan ne’e sira sei hamoos hotu fo’er sira ne’ebe nakonu iha área palasiu,” Xefe Kaza Sivíl ne’e halo previzaun.
Kona-ba Funsionamentu iha prezidénsia Repúblika, Xefe Kaza Sivíl dehan, la’o nafatin tanba sira ne’ebe maka serbisu hanesan oinsa mak palásiu funsiona, gabinete Prezidente, Kaza Sivil nian, média, balun sempre hala’o nafatin serbisu. Maibé, restu ne’ebé la iha atividade, hotuhotu mai fó apoiu hodi halo limpeza iha área palásiu nian.
Notísia Relevante: Palásiu Prezidente Repúblika Sai Palásiu “Lalubur”
Jornalista : Cipriano Colo
Editór : Cancio Ximenes
