DILI, 11 Juñu 2026 (TATOLI)-Konsellu Imprensa (CI, sigla portugés) husu orgaun mídia sira atu garante independénsia editoriál ka labele iha intervensaun polítika ruma husi li’ur hodi hamosu presaun ba jornalista sira-nia servisu.
Diretór Diresaun Análiza no Dezenvolvimentu Mídia (DADM), Alberico da Costa Junior, hateten bainhira mosu intervensaun husi ema li’ur iha redasaun no CI hetan keixa, normalmente CI liuhusi desizaun plenária sei halo monitorizasaun no investigasaun.
Bainhira iha rezultadu investigasaun mak hatudu katak iha intervensaun ruma, entaun Konsellu Imprensa (CI) sei fó xamada ba autór refere.
“Durante ne’e, CI iha ninia kompromisu ba liberdade imprensa hodi garante ba servisu readasaun liuliu jornalista hotu-hotu atu livre husi presaun no interese husi li’ur,” Diretór ne’e informa ba jornalista sira iha edifísiu Konsellu Ministru, Kintál boot, ohin.
Tanba nia konsidera katak papel ida redasaun ne’e ezatamente públiku nian ka la’ós polítiku sira-nian, entaun CI nafatin esforsu atu garante independénsia iha redasaun.
“Maibé hanesan iha mídia partidu nian ne’e buat ketak ida, ne’e atu iha intervensaun mós kestaun sira-nian. Maibé, ba mídia nasionál sira labele mosu intervensaun iha redasaun,” nia dehan.
Jornalista : Alexandra da Costa
Editór : Cancio Ximenes
