Pagamentu saláriu funsionáriu, Prezidente RAEOA: “Iha novidade, ita sei pronúnsia”

OEKUSI, 20 Novembru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, sesta ne’e deklara ona katak, iha tempu-badak sei deklara sai kona-ba razaun atrazamentu pagamentu saláriu ba funsionáriu kontratadu no termu-sertu rihun ida-resin iha Oekusi, ne’ebé seidauk simu dezde fulan-Setembru to’o Novembru ne’e.
“Ha’u lakohi ko’alia iha minutu ida-ne’e, ita haree loron rua, tolu tan, karik iha novidade ruma, ita sei pronúnsia,” nia hatan ba jornalista sira iha salaun edukasaun Oekusi, ohin.
Notísia relevante:Opsaun tolu rezolve saláriu funsionáriu kontratadu rihun ida-resin iha RAEOA
Antes ne’e, iha loron 27 Outubru 2026 ne’e, Prezidente Autoridade RAEOA ne’e, informa, pagamentu saláriu ba funsionáriu kazuál no termu-sertu hamutuk rihun ida-resin iha Oekusi, sei simu iha fulan Novembru no sei simu bazeia tabela funsaun públika nian.
“Prosesu atu aprova pagamentu saláriu ba funsionáriu kontratadu termu-sertu prazu liu ona dezde 15 Outubru, nune’e iha fulan Novembru maka foin bele prosesu ba pagamentu no simu retroativu rapela, husi Setembru, Outubru no Novembr,” nia deklara ba jornalista sira, iha antes ne’e
Notísia relevante:Saláriu funsionáriu kazuál rihun ida-resin iha Oekusi sei simu iha Novembru
Autoridade ne’e esplika, katak prosesu ajustamentu ba saláriu funsionáriu sira, remata ona, nune’e iha prosesu pagamentu ne’e, sei bazeia ba tabela funsaun públiku no dekretu-lei kona-ba nivél saláriu termu-sertu.
“Durante ne’e alokasaun saláriu maioria ne’e la tuir tabela rua ne’e, iha pontu rua, maioria saláriu baixu (tuun) maibé atu aplika tabela funsaun públika loloos sa’e, saláriu tuun tanba alokasaun saláriu vensimentu ba tinan-2026 ne’e, la sufisiénte (la to’o),” nia afirma.
Entaun ho reajustamentu ne’e, nia dehan, ekipa task-forse deteta katak, loloos funsionáriu kontratadu ida tenki simu $450,00 to’o $750,00, maibé defaktu saláriu tuun, entaun presiza halo sinkronizasaun, maibé iha funsionáriu balu, loloos simu direitu $1000,00, maibé simu fali $3000,00, ida-ne’e mós tenke hatuun.
“Agora iha opsaun rua de’it, sei saláriu la hatuun signifika la hetan vensimentu ne’e, prosesu ne’e hotu ona, bazeia orientasaun husi Entidade Tuteladu Superentende RAEOA, no Komisaun Funsaun Públika, ita halo tuir no remata ona, ne’e maka funsaun públika rekomenda ona atu halo aprovasaun finál ba barroment estruturál no nesesita duni barroment husi tetu orsamentu ne’e internu atu haforsa saláriu vensimentu hodi halo pagamentu” nia hateten.
Notísia relevante:MF-KFP koordena atu rezolve saláriu ba funsionáriu kontratu termu sertu
Entretantu, tuir dadus fiskál ne’ebé aprezenta, alokasaun orijinál ba saláriu no vensimentu iha OJE 2026 RAEOA maka US$8.211.000.
Iha fulan Maiu, Governu Sentrál aumenta tan US$2.000.000, inklui US$1.000.000 husi subsídiu Aero-Dili no US$1.000.000 husi Transferénsia Pública FED, ho aumentu ne’e, totál alokasaun sai US$10.211.000.
Husi total ne’e, Prezidente Autoridade Régio da Cruz Salu, hateten katak husi US$8.000.000 gasta ona atu selu funsionáriu sira, enkuantu rezidu osan ne’ebé hela mak US$1.000.000.
Nune’e husi montante ne’e la sufisiente atu kumpre pagamentu funsionáriu kontratadu sira ba períodu Setembru to’o Dezembru 2026.
Jornalista: Abílio Elo Nini
Editór: Rafael Ximenes de A. Belo

