MF-KFP koordena atu rezolve saláriu ba funsionáriu kontratu termu sertu
DILI, 13 Abríl 2026 (TATOLI)–Ministra Finansa (MF), Santina José Rodrigues F. Viegas Cardoso, hateten pagamentu ba funsionariu termu sertu sira Komisaun Funsaun Públika (KFP) koordena hela ho Ministériu Finansa oinsá atu haree no bainhira loos ona mak foin halo pagamentu.
Notísia Relevante: Ministériu la kumpre rejime kontratu termu sertu sei kansela saláriu
“Kona-ba kontratu termu sertu sira, KFP mak haree hela maibé ita koordena hela. Maibé, kontratu termu sertu kada liña ministeriál ida-ida mak sei haree,” Ministra Santina hateten ba jornalista sira hafoin ramata enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru-Pite, ohin.
Rejime jurídiku foun (Dekretu-Lei nú. 3/2026) rasionaliza saláriu funsionáriu kontratadu termu sertu iha Administrasaun Públika Timor-Leste, ho montante entre $750,00 to’o $5.000,00. Ajustamentu ne’e bazeia ba abilidade, esperiénsia, no kualifikasaun akadémika hodi hapara saláriu la uniforme.
Pontu Xave Saláriu Termu Sertu (2026):
- Implementasaun: Komisaun Funsaun Públika (KFP) mak jere ho ajustamentu ona iha Marsu 2026.
- Objetivu: Evita saláriu boot ne’ebé la tuir serbisu no asegura uza orsamentu Estadu nian ho responsabilidade.
- Regra: Instituisaun sira tenke kumpre tabela saláriu foun; la kumpre sei kansela saláriu.
- Esesaun: Rejime foun ne’e la aplika ba Institutu Públiku no Empreza Públika (uza nafatin dekretu-lei 92/2022).
Rejime ida-ne’e garante katak kontratadu sira hetan remunerasaun justa tuir nivel serbisu.
Notísia Relevante: Parlamentu preokupa ho ajustamentu kontratu termu sertu ne’ebé afeta ba saláriu funsionáriu
Jornalista : Hortencio Sanchez
Editór : Cancio Ximenes
