DILI, 01 Abríl 2026 (TATOLI) – Membru Parlamentu Nasionál preokupa ho prosesu ajustamentu kontratu termu sertu ne’ebé afeta ba saláriu atrazu ba funsionáriu sira iha liña ministériu no instituisaun públika sira.
Deputadu Ricardo Baptista husi Partidu Kongresu Nasionál Rekonstrusaun Timorense (CNRT, sigla portugés) husu ba Komisaun Funsaun Públika no Ministériu Finansa atu aselera prosesu ajustamentu ne’e tanba afeta funsionáriu iha ministériu no instituisaun públika balun fulan ida to’o tolu seidauk simu saláriu.
Nia apoia polítika ajustamentu ne’e hodi haree efisiénsia no produtividade iha administrasaun públika, maibé presiza aselera hodi labele afeta funsionáriu sira.
“Funsionáriu barak seidauk hetan sira-nia direitu saláriu, ne’ebé loloos sira simu mensalmente, maibé to’o agora balun sira la hetan, ida-ne’e tanba impaktu husi ajustamentu ne’ebé Governu hamutuk ho Komisaun Funsaun Publika [halo] ajustamentu saláriu kada ministériu sira ne’e”, nia hateten.
Deputadu Antoninho Bianco husi Frente Revolusionária Timor-Leste Independente (FRETILIN) mós preokupa ho saláriu funsionáriu nian ne’ebé atrazu no ida-ne’e responsabilidade Governu nian, liuliu instituisaun relevante sira katak loloos kontrata ema halo serbisu tenke iha devér atu selu. “Ne’e viola direitu funsionáriu sira, presiza rezolve”, nia lamenta.
Tuir nia, reforma ne’ebé hala’o presiza haree ba efisiénsia no efikásia ba servidór atu mákina administrasaun públika tenke tetu ema ne’ebé kualidade no koloka tuir méritu no tuir nesesidade instituisaun nian. “La’ós atu hasai no hatama fali ema seluk tuir kór no dalaruma hatama ema tuur fatin de’it mós laiha”, nia dehan.
Ba kestaun ne’e, jornalista Tatoli tenta atu konfirma ho KFP ba prosesu ajustamentu kontratu termu sertu ba liña ministériu no instituisaun públika sira, maibé dirijente sira KFP laiha fatin tanba hala’o hela viajen serbisu bá munisípiu.
Lembra katak KFP hasai ona sirkulár ba liña ministériu sira atu kumpre dekretu-lei foun númeru 3/2026 kona-ba rejime kontratu termu sertu iha administrasaun públika.
Dekretu foun ne’e foka ba ajustamentu salariál ba ajente administrasaun públika, kazuál, rejime jerál no asesór sira ne’ebé tama ho kontratu termu sertu no ajustamentu ne’e bazeia ba esperiénsia serbisu no kualifikasaun akadémika. Nune’e, durante loron 30 to’o iha 03 Marsu tenke halo ajustamentu.
Notísia relevante: KFP presiza define forsa traballu iha administrasaun públika
Jornalista: Nelson de Sousa
Editora: Maria Auxiliadora
