Estudante 34.112 iha Bobonaru sei realiza ezame pasajen klase

BOBONARU, 18 Novembru 2026 (TATOLI) – Estudante hamutuk 34.112 iha munisípiu Bobonaru sei realizaezame pasajen klase ba tinan letivu 2026, ne’ebé tuir kalendáriu sei komesa iha loron 23 Novembru 2026.
Diretór Servisu Munisipál Edukasaun Autoridade Munisípiu Bobonaru, Miguel Freitas, informa katak estudante sira ne’ebé sei realiza ezame ne’e mai husi nivel ensinu pré-eskolár to’o ensinu sekundáriu no tékniku-vokasionál.
“Estudante ne’ebé sei partisipa iha ezame ho totál 37.949, mai husi ensinu pré-eskolár to’o ensinu sekundariu no tékniku vokasionál. Ho totál ida-ne’e sira ne’ebé tuir ezame nasionál iha 3.837, husi ida-ne’e sira ne’ebé preparadu atu realiza ezame pasajen klase iha dia 23 agora hamutuk 34.112. Ba sira ne’ebé moras, ami sei orienta profesór sira atu fó oportunidade segundu tempu para sira mós bele tuir ezame”, nia informa ba jornalista sira.
Dirijente ne’e esplika katak preparasaun ba matéria ezame pasajen klase hotu-hotu kompleta ona, tanba iha semana kotuk, profesór sira husi kada grupu no sentru edukasaun elabora ona matéria ezame.
Ho preparasaun ne’e, Miguel afirma katak Diresaun Servisu Edukasaun Munisipál hein de’it realizasaun ezame tuir kalendáriu ne’ebé determina ona.
“Husu ba estudante sira atu realiza ezame pasajen klase kuidadu saúde, nune’e iha tempu ne’ebé atu realiza ezame partisipa ho di’ak, liuliu atensaun iha dalan, lori motór ho karreta kuidadu-an iha dalan”, nia dehan.
Aleinde ne’e, ba ezame nasionál, diretór relata katak estudante na’in-haat iha Bobonaru sei realiza ezame segunda xamada ne’ebé sei hahú iha aban, loron 19 Novembru 2026.
Notísia relevante: Estudante 1,200 iha Bobonaro sei partisipa ezame nasionál
Estudante na’in haat ne’e ida mai husi ensinu sekundáriu no tolu seluk husi ensinu báziku. “Ha’u-nia mensajen ba partisipante ezame segundu xamada nian, ha’u enkoraja sira, ein prinsípiu tenke kuidadu-an didi’ak para aban bele prontu mai tuir ezame, nune’e bele hetan no simu rezultadu ho di’ak”, nia hato’o.
Notísia relevante: Edukasaun Bobonaro garante ezame períodu daruak la’o ho di’ak
Jornalista: Sergio da Cruz
Editora: Maria Auxiliadora

