BOBONARO, 12 jullu 2024 (TATOLI) – Diresaun Servisu Edukasaun Munisípiu Bobonaro, lideradu Miguel Freitas, preparadu no garante ezame períodu daruak tinan letivu 2024 sei la’o ho di’ak no susesu.
Diretór Edukasaun Munisípiu Bobonaro, Miguel Freitas, esplika, lala’ok ezame faze daruak nia sei nafatin iha relasaun ho faze priemeiru nian, ne’ebé nafatin tau konfiansa ba inspetór eskola sira atu realiza.
Notísia relevante: Estudante 4.159 iha Bobonaro sei partisipa ezame nasionál
“Ohin ha’u mós konsulta ho superintedente nia mós dehan fó hatene hotu ona inspetór sira, sé asuntu ruma mak saida ami sei haree, maibé durante ne’e ami la rona, kerdizer ida-ne’e sei la’o ho di’ak ba oin. Ha’u husu ba estudante sira atu tau atensaun ba ita-nia estudu, tau ita-nia aan ho di’ak ba ita-nia vida iha future,” nia informa ba jornalista sira iha Ensinu Tékniku Vokasionál Maliana Yamato Maliana, sesta ne’e.
Nia dehan, foin lalais iha semana rua liubá Diresaun Edukasaun Munisípiu Bobonaro mós distribui ona orsamentu konsesaun eskolár ba eskola ensinu báziku hamutuk 23 ne’ebé eziste iha munisípiu Bobonaro atubele preparasaun ba hasoru ezame trimestre daruak.
Nia parte submete ona dadus ba Ministériu Edukasaun atu koloka profesór foun bainhira pasa iha teste bolsa kandidatu profesór faze daruak nian.
Nia dehan, bainhira ME responde pedidu ne’e sei koloka profesór ba eskola sira-ne’ebé durante ne’e enfrenta problema menus profesór hanesan Ensinu Báziku Dom Caileto Bobonaro no seluk tán.
“Ami konfirma tiha ona katak profesór destakadu ne’ebé sei mai, ne’e sei fó kompeténsia ba Diresaun Servisu Munisipál Edukasaun atu koloka. Ho ida-ne’e ami sei tau atensaun ba Dom Caileto no seluk tan, ami husu profesór língua portugés 25, ingles 25, siénsia naturál 20 no seluk tan,” nia katak.
Enkuantu totál estudante iha munisípiu Bobonaro hamutuk rihun 32-resin mai husi ensinu báziku to’o ensinu sekundariu jerál.
Notísia relevante: Estudante 30.429 tuir ezame trimestre dahuluk iha Bobonaro
Jornalista: Sérgio da Cruz
Editór: Evaristo Soares Martins
