BOBONARO, 10 outubru 2023 (TATOLI) – Diretór Servisu Munisípiu Bobonaro, Crispim Moniz, informa, totál estudante na’in-4159 mak sei partisipa ezame nasionál tinan letivu 2023.
Notísia relevante: Estudante Bobonaro 531 ne’ebé asesu bolsa méritu iha ona konta bankária
“Ita-nia estudante ne’ebé mak sei partisipa iha izame nasionál mai hosi nível ensinu báziku 2,309, nível tékniku vokasionál 520, ensinu sekundária jerál 1,330,” nia informa ba jornalista sira iha salaun administrasaun munisípál Bobonaro, tersa ne’e.
Nia dehan, finalista sira preperadu atu enfrenta ezame refere tanba antes ne’e liuhosi Programa Grupu Traballu Profesór halo rezumu ba matéria no matrix sira-ne’ebé atu sai iha ezame nasionál.
Eskola ne’ebé identifikadu sai fatin ba realizasaun ezame nasionál komposta hosi Ensinu Sekundáriu Jerál (ESG, sigla portugés) públiku rua, Katólika neen no Tékniku Vokasionál hitu.
Enkuantu ba Ensinu Báziku 30, Eskola Bázika Sentrál (EBC, sigla portugés) públiku 23, Eskola Katólika no Privadu hitu.
“Jeralmente eskola sira-ne’e nia kondisaun preparadu atubele realiza ezame nasionál,” nia katak.
Daudaun ne’e Servisu Munisipál Edukasaun Bobonaro hala’o ona enkontru preparasaun hodi forma komisaun organizadora ba ezame nasionál, verifikasaun ba dadus finalista, halo liña koordenasaun ho Polísia Nasionál Timor-Leste (PNTL) atu fó seguransa durante transportasaun pontu izame hosi Dili mai Bobonaro la’o ho seguru.
Nune’e mós halo planu ba distribuisaun pontu ezame iha nível munisipál, postu administrativu neen no ba eskola sira.
Notísia relevante: Estudante 235 iha Bobonaro tuir ona entrevista atu asesu bolsa hakbiit
Jornalista : Sérgio da Cruz
Editór : Evaristo Soares Martins
