BOBONARO, 08 fevereiru 2023 (TATOLI)-Diretór sentru solidariedade sosiál no inkluzaun munisípiu Bobonaro, Francisco Tilman, hateten dadus provizóriu iha estudante hamutuk na’in-235 mak tuir ona entrevista hosi Fundu Dezenvolvimentu Kapitál Humanu (FDCH) atu asesu ba bolsa hakbiit hodi kontinua estudu iha nível universitáriu.
Nia haktuir, kandidatu hirak-ne’e mai hosi postu administrativu Maliana no Cailaco ne’ebé hahú rejista iha ona iha loron (06/02) to’o (08/02).
Notísia relevante: FDCH prevee millaun $17 ba programa haat iha tinan 2023
“Ita-nia postu Maliana vila de’it ami simu dadus 210, Cailaco 25, maibé ne’e provizóriu tanba hosi FDCH sei prolonga tán hafoin haree kondisaun estrada,” nia informa ba jornalista sira, iha edifísiu Rádiu Komunidade Maliana, kuarta ne’e.
Francisco akresenta, ohin loron (08/02) ne’e FDCH kontinua halo atendimentu iha postu administrativu Atabae ba kandidatu na’in-60 ne’ebé mak prienxe ona formuláriu.
Tuir nia, hafoin remata iha Atabae sei kontinua ba postu administrativu sira seluk hanesan Bobonaro no kontinua ba Lolotoe, taka iha postu administrativu Balibo iha loron (14/02).
Formuláriu ne’ebé distribui ona kada postu ema na’in-60 maibé barak liu iha kapitál Maliana.
“Ita fó barak liu ba kapitál Maliana tanba nia kapitál munisípiu ema barak liu ita fó 210, maibé selesaun finál depende ba MSSI, MAE, MEJD no FDCH,” nia katak.
Nia dehan, bolsa hakbiit ne’e iha oin rua, ida ba agrikultór nia oan ho notas 6,0 no bolsa hakbiit parsiál ba funsionariu nia oan ho notas 7,5 ba leten.
Bolsu estudu ne’e rasik fó prioridade liu ba estudante feto no mane ne’ebé seidauk forma família ka klosan ne’ebé inan-aman laiha kbiit atu kontinua estudu.
“Objetivu loloos hosi bolsa hakbiit ne’e atu sestenta no tau matan ba bolseiru sira-ne’ebé atu kontinua sira-nia estudu iha universitáriu tantu públiku hanesan UNTL no privada hanesan UNPAZ, CRISTAL, UNITAL, UNDIL, ICS ho sira seluk ne’ebé iha Timor, konforme informasaun ami hetan sira-ne’ebé liu selesaun sei hetan $120 kada fulan, atubele fasilita osan selu kos, haan-hemu no osan transporte,” nia hateten.
Diretór Franciaco husu estudante ne’ebé iha interese atu kompete iha bolsu estudu ne’e nia kriteria mak hanesan fotokópia diploma sekundária legalizadu, sertidaun nasimentu RDTL, deklarasaun suku visto pelo hosi administradór postu.
“Husu ba estudante sira ne’ebé remata ona iha sekundaria prepara imi-nia dokumentu atubele mai tuir teste hodi bele kontinua imi-nia estudu iha universitáriu,” nia informa.
Tuir dadus iha munisípiu Bobonaro FDCH sei halo atendimentu ba kandidatu na’in 700-resin.
Notisia relevante: FDCH prevee $270.600 ba bolseiru 66 kontinua estudu iha Xina
Jornalista: Sérgio da Cruz
Editór: Evaristo Soares Martins
