DILI, 13 outubru 2022 (TATOLI)—Komisaun G Parlamentu Nasionál (PN) ne’ebé trata asuntu edukasaun, juventude, kultura no sidadania, halo audiénsia públika ho Fundus Dezenvolvimentu Kapitál Umanu (FDCH, sigla portugés) kona-ba alokasaun orsamentu $17.748.526 ba prioridade haat iha tinan 2023.
“Proposta orsamentu tetu fiskál tinan 2023 ne’ebé ita aprezenta ba Parlamentu Nasionál hetan apresiasaun boot hosi komisaun G, sira husu ita atubele kontinua tan programa sira ne’ebé iha ona ba futuru,” Diretór Ezekutivu FDCH, Cristóvão dos Reis, hateten, hafoin ramata audiénsia públika ho komisaun G, iha sala konferénsia PN, kinta ne’e.
Notísia relevante: FDCH prevee $270.600 ba bolseiru 66 kontinua estudu iha Xina
Programa prioridade haat ne’ebé FDCH iha mak hanesan formasaun profisionál, treinamentu tékniku, bolsa estudu no boa governasaun no jestaun institusionál.
“Programa haat ne’e FDCH trasa ba tinan 2023 akumula sub-programa 22 no atividade 36, tanba ne’e hosi programa formasaun profisionál akumula sub-programa ida no atividade rua hetan alokasaun orsamentu $874.000,” nia akresenta.
Aleinde ne’e, programa prioridade ba treinamentu tékniku ho ninia sub-programa 12 no atividade 14 hetan alokasaun orsamentu $3.597.468, programa prioridade ba bolsa estudu ho ninia sub-programa ualu no atividade 18 hetan alokasaun orsamentu $12.382.218.
Programa prioridade boa governasaun no jestaun institusionál ho sub-programa ida no atividade rua ne’e hetan alokasaun orsamentu $894.840.
“Hosi programa haat ne’e FDCH sei rekruta tan bolsa hakbiit hamutuk 1.000 resik atu nune’e bele kompleta meta VIII Governu Konstitusionál nian katak iha tinan 2023 ne’e tenke atinje bolsa hakbiit hamutuk 3.000. Enkuantu bolsa parsiál rasik tuir meta ne’ebé iha, sei rekruta tan 200,” nia esplika.
Jornalista : Tomé Amado
Editora : Julia Chatarina
