Estudante 1,200 iha Bobonaro sei partisipa ezame nasionál
BOBONARO, 07 outubru 2024 (TATOLI)- Diresaun Edukasaun Munisípiu Bobonaro, fó-sai katak, totál estudante finalista husi ensinu báziku, ensinu sekundáriu jerál no tékniku vokasionál na’in 1,200-resin mak sei partisipa ezame nasionál ne’ebé tuir kalendáriu sei realiza iha loron 14 fulan outubru tinan 2024.
“Númeru estudante ami fahe hotu ona, totál estudante ne’e iha 1,200-resin sei tuir ezame nasionál,” Diretór Edukasaun Munisípiu Bobonaro, Miguel Freitas, informa ba jornalista sira iha edifísiu administrasaun munisipál Bobonaro, segunda ne’e.
Enkuantu ezame nasionál no lokál tinan ne’e, edukasaun munisipál Bobonaro sei koloka vijilante nai’in-rua kada sala.
Miguel hatutan, preparasaun ba kolokasaun vijilante no preparasaun seluk tan ne’ebé edukasaun munisipál Bobonaro halo kuaze konklui.
“Iha dia 11 agora ami sei ba foti pontu ezame nasionál iha Ministériu Edukasaun Dili, depois hodi mai ami direitamente asegura iha Polísia, depois kontinua halo distribuisaun ba postu administrativu sira,” nia esplika.
Diretór Miguel Freitas, fundamenta kona-bá matéria ezame lokál nia mós preparadu hotu ona, hein haruka ba nasionál.
Biban ne’e nia apela ba estudante sira atu estuda maka’as no prepara-an intermu fíziku no mentál hodi hasoru ezame nasionál no lokál.
“Ha’u fó hanoin ba estudante sira katak buat ne’ebé la akontese, labele kedas, ezemplu iha tinan uluk estudante husi ensinu sekundáriu mak hela barak, ne’ebé ha’u husu atu prepara-an didiak liután atu tinan uluk ne’e labele akontese tán,” nia fó hanoin.
Entertantu Diretór Ensinu Bazíku Sentrál (EBC, sigla portugés) Raifun, Domingos Mendes, reforsa preparasaun ba elaborasaun pontu ezame lokál no seluk tan kuaze hotu ona, hein de’it atu implementa.
“Ami hein de’it mak oráriu izame ho oráriu vizitante iha semana ne’e nia laran ami elabora hela, atu nune’e iha loron rua ka tolu tan ami sei taka iha kuadru avizu, atu nune’e estudante ho vizitante sira bele tau atensaun,” nia esplika.
Enkuantu totál estudante iha EBC Raifun ne’ebé sei partisipa izame nasionál no lokál na’in-204.
Notísia relevante: Estudante 3.260 iha Oé-Cusse mak sei realiza ezame nasionál
Jornalista: Sérgio da Cruz
Editór: Evaristo Soares Martins
