OÉ-CUSSE, 19 Setembru 2024 (TATOLI) – Alunu hamutuk 3.260 ne’e mai husi ensinu báziku, sekundáriu jerál no tékniku vokasionál mak sei partisipa ezame nasionál iha Outubru ne’e, informa Xefe Departamentu Kurríkulu Ezame Nasionál, Damião da Costa.
Nia hateten estudante husi ensinu báziku hamutuk 1.794, komposta husi mane 854 no feto 950, ne’ebé mai husi eskola 22. Ensinu sekundáriu iha alunu hamutuk 1.045, komposta husi mane 539 no feto 506, ne’ebé mai husi eskola sekundária jerál tolu.
“Husi númeru ne’e siénsia téknolojia hamutuk na’in-543, mane 261 no feto 282 no siénsia sosiál hamutuk na’in-512, mane 278 no feto 224”, Damião da Costa adianta ba Tatoli iha Oé-Cusse, ohin.
Notísia relevante: Sentru Komunitáriu Aprendizajen Oé-Cusse prepara estudante 40 realiza ezame nasionál
Kona-ba tékniku vokasionál iha totál estudante hamutuk 421, komposta husi mane 199 no feto 222, ne’ebé mai husi ETV Palaban, ETARO-Masin, Lifau no ETV Pássabe.
“Iha loron 08 Outubru ne’e, ha’u sei bá Dili atu foti pontu ezame sira iha Ministériu Edukasaun no loron 09 ha’u mai fali, loron 11 no 12 Outubru ami halo distribuisaun ba eskola sira. Iha 14 Outubru realiza ezame nasionál. Ami enkontru ona ho dirijente eskola sira, forma ona komisaun organizadora no forma ona profesór vijilánsia ba ezame nasionál kada eskola, ne’ebé hotu-hotu preparadu”, nia informa.
Nia salienta katak númeru kandidatu ba ezame nasionál iha tinan ne’e barak, nune’e persiza ekiapamentu sufisiente atu alunu sira bele tuir ezame ho seguru, liuliu kadeira no meza.
Damião da Costa apela ba estudante sira atu kontinua estuda hodi prepara-aan ho másima, nune’e bele hasoru ezame nasionál ho di’ak atu responde ba pontu ezame sira-ne’ebé daudaun Ministériu Edukasaun prepara hela.
“Ezemplu mak ezame nasionál la’o daudaun mak iha alunu balun hetan dezastre no la konsege tuir ezame ne’e, sira sei tuir fali iha ezame segunda xamada no ne’e mós iha nia tempu determinadu. Se to’o tempu determinadu mak alunu ne’e la konsege, entaun hein fali tinan oin”, epslika.
Notísia relevante: Konsensaun eskolár tama tarde sei afeta ba ezame nasionál
Antes ne’e, Ministériu Edukasaun liuhusi Gabinete Unidade Kurrikulu Nasionál fó-sai dadus provizória ne’ebé iha mak husi ensinu báziku iha alunu hamutuk 29.252, ensinu sekundáriu jerál 24.894 no tékniku vokasionál hamutuk 4.125.
Dixiplina ezame nasionál ba ensinu báziku mak hanesan matemátika, inglés, portugés, istória, jeografia, siénsia naturál no tetun.
Ba ensinu sekundáriu jerál mak matemátika, ekonomia kuantitativu, inglés, portugés, kímika, istória, biolojia, sosiolojia, fízika, jeografia no tetun. Ba ensinu sekundáriu tékniku vokasionál mak matemátika, ekonomia kuantitativu, portugés, fízika, kímika, sosiolojia, jeografia no sosiolojia, istória no biolojia.
Notísia relevante: ME hahú halo imprensaun ba pontu ezame nasionál
Jornalista: Abílio Elo Nini
Editora: Maria Auxiliadora
