DILI, 12 setembru 2024 (TATOLI)–Diretór Eskola Ensinu Sekundáriu Jerál (ESJ) 05 Maiu Becora, Casmiro Dias Marques, hateten, bainhira osan konsensaun eskolár ba fulan ida-ne’e mak nafatin la tama iha konta bankária kada eskola, maka sei afeta ba atividade eskola, liu-liu ezame nasionál.
“Eskola públika sira-ne’e nia atividade atu la’o só iha osan konsensaun eskolár, agora primeiru no segundu trimestre ne’e ita liu ona, maski osan konsensaun eskolár ne’e la tama maibé tanba ita sei halo empréstimu iha rentál sira hodi halo imprensaun no hein osan tama mak selu, maibé to’o agora osan ne’e mós nafatin seidauk tama, entaun ida-ne’e sei afeta ba ezame nasionál, tanba rentál sira ne’ebé halo imprensaun ne’e seidauk selu,” Diretór eskola informa, iha ninia knaar fatin, Becora, kinta ne’e.
Maski osan seidauk tama iha konta bankária eskola, maibé nu’udár responsável eskola daudaun ne’e hahú halo ona preparasaun balun ba ezame nasionál.
“Ita nu’udar responsável tenke uza maneira oin-oin, tanba ne’e ami esforsu-an rasik hodi realiza serbisu balun atu hein ba ezame nasionál. Tanba ne’e, ami hahú halo preparasaun ba ezame nasionál ne’e, ami haruka ona estudante sira ba hasai foto, liu-liu ba kartaun ezame nune’e mós ba diploma,” nia akresenta.
Notísia relevante : Servisu Edukasaun Manatuto husu ME no MF aselera pagamentu konsensaun eskolár
Eskola públika ne’e rejista estudante hamutuk 498 sei tuir ezame nasionál tinan ne’e.
Iha sorin seluk, Diretór Eskola ESJ 12 Novembru, Marcelino Menezes Babo, preokupa hela ba osan konsensaun eskolár tanba ezame nasionál besik ona.
“To’o agora konsensaun eskolár ne’e seidauk tama, no la tama nafatin hanesan ne’e sei afeta ba ezame nasionál,” Diretór Eskola, tenik.
Maski nune’e, eskola ne’e nafatin halo pereparasaun hodi hein konsensaun eskolár.
“Ita halo revizaun ba matéria sira atu estudante bele estuda no prepara-an, depois ita mós haruka ona sira hasai foto ba kartaun nomós diploma,” nia katak.
Estudante hamutuk 514 husi Eskola ESJ 12 Novembru Becora sei partisipa ezame nasionál.
Hatan ba kestaun ne’e, Diretór Jerál Ensinu Sekundáriu Jerál iha Ministériu Edukasaun (ME), Deolindo da Cruz, hateten, ME finaliza ona prosesu, nune’e hein de’it Ministériu Finansa (MF) atu transfere osan ba konta bankária eskola.
“Ami manda hotu ona bá Ministériu Finansa no sira halo prosesu hela kode vendór ba kada eskola sira, purtantu ida-ne’e mak finaliza ona osan transfere ona ba kada eskola. Ita nafatin esforsu atu prosesu sira ne’e lalais oituan, nune’e bele responde ba nesesidade eskola sira ne’ebé atu hasoru ezame.” nia hato’o.
Jornalista : Osória Marques
Editora : Julia Chatarina
