Servisu Edukasaun Manatuto husu ME no MF aselera pagamentu konsensaun eskolár
DILI, 27 agostu 2024 (TATOLI)–Diretór Servisu Edukasaun Munisípiu Manatuto, Patrício da Cruz Quintão, informa, ezame nasionál la’o ho di’ak no susesu nune’e husu ba Ministériu Edukasaun (ME) no Ministériu Finansa (MF) atu aselera pagamentu konsensaun eskolár.
“Ha’u iha hela Ministériu Edukasaun no sira dehan tuir alvu katak fulan-agostu nia rohan osan konsensaun eskolár tama ona ba kontra bankária eskola nian. Tanba iha atividade lubuk ida tenke hetan suporta no tuir sirkulár ne’ebé Ministériu Edukasaun, loron 28 novembru tenke halo preparasaun ho di’ak nune’e tenke iha konsensaun eskolár ne’e,” Diretór Edukasaun Munisipál ihateten ba Agência Tatoli, iha ninia knaar fatin, Vila-Verde, tersa ne’e.
Notísia relevante : Konsensaun eskolár ba ESJ-ESTV iha faze prosesa kódigu fornesedór iha MF
Tuir informasaun ne’ebé iha katak ME halo pedidu ba MF hafoin ba Banku Nasionál Komérsiu Timor-Leste (BNCTL, sigla portugés), hafoin mak to’o iha konta eskola nian.
“Tanba ne’e nafatin rekomenda ba Ministériu Edukasaun atu aselera prosesu ne’e tanba atividade hotu eskola presiza osan,” nia akresenta.
Hatán ba kestaun ne’e, Diretór Nasionál Sekundáriu Jerál iha ΜΕ, Benjamin Fernandes, hateten, konsensaun eskolár ba Ensinu Sekundáriu Jerál no Ensinu Sekundáriu Tékniku Vokasionál daudaun ne’e iha ona faze prosesa kódigu fornesedór iha MF.
“Bainhira sai ona mak transfere tama ba eskola ida-idak nia konta bankária. Tanba ita-nia prosesu administrasaun hotu ona no buat hotu hein de’it mak finansa nasionál,” nia tenik.
ME entrega ona prosesu hotu ba MF, nune’e Diretór husu ba kada eskola atu hein prosesu iha MF.
Jornalista : Osória Marques
Editora : Julia Chatarina
