OÉ-CUSSE, 18 Setembru 2024 (TATOLI) – Estudante hamutuk 40 husi Sentru Komunitáriu Apredizajen (SKA) iha Rejiaun Administrativa Espesiál Oé-Cusse Ambeno (RAEOA) sei realiza ezame nasionál iha tinan ne’e.
“Dadus estudante sira-ne’ebé atu realiza iha ezame nasionál tinan ne’e hamutuk na’in-40, mai husi Sentru Komunitária Lifau na’in-29 no Sentru Komunitáriu Baqui na’in-sia”, Prezidente Sentru Komunitáriu Oé-Cusse, Joaquim de Araújo, adianta ba jornalista sira iha Oé-Cusse, ohin.
Nia lembra katak Governu loke ensinu rekorrente iha Oé-Cusse iha 2015 hamutuk rua, ida lokaliza iha Eskola Bázika Sentrál (EBC, sigla portugés) Baqui, iha suku Naimeko no seluk iha Sentru Komunitária Lifau, iha suku Costa.
Notísia relevante: KNTLU-Ministériu Edukasaun inaugura Sentru Komunitáriu Aprendizajen tolu
“Agora, iha anu letivu 2024 ne’e, iha faze rua. Iha Sentru Komunitáriu Lifau iha faze kuatru akumula estudante na’in-32 maioria mane no faze cinco akumula estudante na’in-29 mak agora prepara hela atu partisipa iha ezame nasionál. Ida-ne’e ba sira-ne’ebé putus eskola iha sekundáriu mak mai kontinua”, nia dehan.
Kona-ba kritériu ba estudante sira-ne’ebé hakarak mai kontinua sira-nia estudu iha Sentru Komunitáriu Aprendizajen ne’e maka liuhusi inskrisaun ba estudante sira. Primeiru, hatama sira-nia dokumentu hanesan eleitorál, sertidaun batizmu ka RDTL no kaderneta eskolár, nune’e bele enkaixa iha ensinu rekorrente.
Hafoin ne’e, sei halo teste diágnotíku ba estudante sira no ida-ne’ebé hetan valór di’ak sei koloka ba iha faze cinco no ba sira-ne’e laliu sei tama iha faze kuatru. “Entaun, faze kuatru ne’e akumula ba primeiru no segundu anu no faze cinco mak koloka ba terseiru anu atu prepara ba ezame nasionál”, esplika.
Iha Sentru Komunitáriu Lifau iha programa tolu mak hanesan alfanamór, ekivalénsia nivel I no ekivalénsia nivel II, ho totál profesór na’in-10.
Notísia relevante: ME prevee rihun $409.3 ba programa ensinu rekorrente
Iha biban ne’e, estudante Nélson Assis Belo dehan prezensa ensinu rekorrente iha Oé-Cusse importante tanba bele fasilita ona joven barak atu kontinua sira-nia estudu.
“Ha’u kontente tanba ne’e oportunidade di’ak atu kontinua ami-nia estudu, tanba durante ne’e ami hakotu ami-nia eskola, maibé Governu bele kria polítika ne’e. Ha’u hakotu eskola iha Baucau tanba situasaun ekonomia, ne’e mak ha’u la kontinua, maibé agora agradese tinan ne’e ha’u bele tuir ezame nasionál”, nia realsa.
Notísia relevante: MEJD halo preparasaun elabora kurríkulu rekorrente ensinu sekundáriu
Jornalista: Abílio Elo Nini
Editora: Maria Auxiliadora
