OÉ-CUSSE, 25 Abríl 2024 (TATOLI) – Komisaun Nasionál Timor-Leste ba UNESCO (KNTLU) no Ministériu Edukasaun (ME), liuhusi Diresaun Nasionál Ensinu Rekorrente inaugura simbolikamente Sentru Komunitáriu Aprendizajen (SAK) tolu ne’ebé eziste iha fatin lahanesan. Serimónia ne’e realiza iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Sentru tolu ne’e, ida iha Pante Makasar ho naran SKA Lifau ne’ebé nia obra gasta rihun $23, no sentru Knuuk ba Moris lokaliza iha suku Babulu, postu administrativu Same-Manufahi ne’ebé nia konstrusaun gasta montante hanesan no ikus mak sentru Laklubar ne’ebé eziste iha suku Orlalan, iha postu administrativu Laklubar-Manatuto ho gastu rihun $12, ne’ebé kompleta kedan ho ekipamentu hanesan komputadór no mákina impresora, meza, kadeira no ármariu.
Sekretáriu-Ezekutivu KNTLU, Luís Nívio de Fátima Soares, informa KNTLU iha kompromisu hodi apoia Ministériu Edukasaun harii sentru komunitáriu atu fó oportunidade aprendizajen liuhusi programa sira hanesan analfabetizasaun no programa ekivalénsia, nune’e bele kontribui hamenus taxa análfabetu no hadi’a kualidade edukasaun.
“Programa analfabetizasaun, ekivalénsia no programa abilidade moris tenke la’o. Edifísiu foun ne’ebé ohin ita inaugura, ita bele kontribui hasa’e taxa literasia, aleinde ne’e bele implementa mós programa ekivalénsia ba maluk ne’ebé seidauk remata eskola ka putus sekolah, no ha’u fiar katak programa ne’e ita foin mak hahú iha terseiru siklu nian hanesan mós programa abilidade moris ka life skill”, Luís Soares dehan iha ámbitu inaugurasaun SKA tolu ne’e.
Nia rekorda katak, iha 2010, Komisaun Nasionál Koreana ba UNESCO lansa Programa Kooperasaun ba Dezenvolvimentu Edukasaun no Timor-Leste implementa iha 2019. “KNTLU serbisu hamutuk ho Ministériu Edukasaun, liuhusi Diresaun Nasionál Ensinu Rekorrente koordena no aplika fundu millaun $1 ba tinan lima, entre 2019 no 2024, entaun ita halo [edifísiu ho] fazeadamente]”, nia realsa.
Programa ne’ebé KNTLU halo nia objetivu mak atu fó oportunidade ba ema sira-ne’ebé marjinalizadu atu sira ne’ebé seidauk hetan oportunidade bele mós hetan oportunidade hanesan.
Tanba ne’e, bazeia ba planu estratéjiku 2019 no 2024, KNTLU tau prioridade ba tinan lima tenke reabilita ka konstrui Sentru Komunitáriu 15 iha territóriu, maibé daudaun ne’e harii ona edifisiu foun no balun reabilita hamutuk 13, falta rua mak sei konstrui iha Aileu no Ataúro.
Iha biban ne’e, Diretór Nasionál Ensinu Rekorrente, Alfredo de Araújo, hateten Ministériu Edukasaun komprometidu hodi tau prioridade ba SKA nu’udar programa determinante ba dezenvolvimentu nasaun.
“Tanba ne’e, sentru aprendizajen ida-ne’e harii atu ita hakarak eleva kualidade ba rekursu ida-ne’ebé bele sai di’ak no ha’u hato’o agradese ba parseiru hanesan Governu Koreia ne’ebé ajuda tebes liuhusi Komisaun Nasionál Timor-Leste ba UNESCO, tanba apoia fundu ba iha Ministériu Edukasaun hodi harii sentru sira-ne’e”, nia hato’o.
Iha sorin seluk, reprezentante Sekretáriu Rejionál ba Asuntu Edukasaun no Solidariedade Sosiál, Tomás Tout, konsidera sentru ne’e sei akumula ema barak atu kontinua aprende.
“Ami orgullu tanba bele harii sentru ida iha Lifau atu akumula suku ualu iha sub-rejiaun Pante Makasar, tanba edukasaun ne’e la’ós formál de’it, maibé informál ne’e mós importante, tanba ita-nia sistema edukasaun iha Timor-Leste inkluzivu, signifika ita labele haluha ema ida iha kotuk atu aprende”, nia salienta.
Notísia relevante:UNESCO harii tan SKA iha Aileu-Ataúro ihatinan ne’e
Tuis dadus, sentru aprendizajen Oé-Cusse rejista ona ema hamutuk na’in-60, maioria husi ensinu báziku primeiru no segundu siklu.
Jornalista: Abílio Elo Nini
Editora: Maria Auxiliadora
