Estoke plástiku raan menus iha Hospitál Nasionál Guido Valadares

DILI, 17 Novembru 2026 (TATOLI)—Diretór Servisu Apoiu Diagnóstiku no Terapêutika Hospitál Nasionál Guido Valadares (HNGV), Vidal de Jesus Lopes, rekoñese estoke plástiku raan menus iha Hospitál Nasionál Guido Valadares.
“Banco de Sangue HNGV iha responsabilidade atu buka rekolla, konserva no distribui raan ba pasiente sira-ne’ebé presiza. Maibé, iha fulan-Setembru ikus, instituisaun ne’e enfrenta problema menus plástiku raan, ne’ebé sai obstákulu ba kontinuidade servisu,” Vidal Lopes hateten ba jornalista sira iha HNGV, ohin.
Nia hateten, banco de sangue kontinua buka solusaun no halo esforsu atu hetan plástiku raan, hodi garante katak servisu rekolla no distribuisaun raan ba pasiente sira bele kontinua.
“Iha ne’e, demanda ba raan ne’e makaas, úniku departamentu banku de sangue iha HNGV ne’e nia servisu mak atu buka raan, rekolha raan no konserva raan no fó pasiente sira-ne’ebé mak presiza. Iha fulan-Setembru ikus ne’e, ita enfrenta duni kona-ba problema plástiku raan nian. Ita tenta buka maneira hotu, hanesan nafatin ida-idak ho nia servisu no buka plástiku raan ne’e,” Vidal de Jesus Lopes hateten.
Nia relata, banco de sangue simu pedidu apoiu husi instituisaun oioin inklui PNTL, Universidade, instituisaun relijiozu no entidade seluk, atu fó apoiu tékniku ba atividade doasaun raan ba sira-nia funsionáriu.
Vidal de Jesus Lopes hateten,pedidu hirak ne’e ekipa HNGV fó apoiu tékniku ba instituisaun sira-ne’ebé bele halo doasaun ba raan, enkuantu pedidu sira-ne’ebé presiza plástiku raan sei hein resposta husi Institutu Nasionál Farmásia no Produtu Médiku (INFPM).
“Fornese plastiku raan nu’udar responsabilidade INFPM, no komunikasaun entre instituisaun rua kontinua la’o di’ak. INFPM fó ona resposta ba nesesidade emerjénsia ne’ebé HNGV hasoru, no ekipamentu ne’ebé hetan utiliza ona atu asegura kontinuidade servisu,” nia dehan.
Nia husu atu fornese plástiku raan la’ós de’it bainhira mosu situasaun emerjénsia, maibé tenke garante mós fornesimentu kontinua no sustentável atu responde ba nesesidade HNGV iha tempu naruk.
Iha sorin seluk, Diretóra Ezekutiva Institutu Nasionál Farmásia no Produtu Médiku (INFPM), Paulina Mendonça, hateten INFPM halo ona distribuisaun plástiku atu halo doasaun raan ba Hospitál Nasionál Guido Valadares (HNGV) hafoin HNGV enfrenta problema stock out.
Paulina Mendonça esplika, INFPM buka ona solusaun atu rezolve problema ne’e no halo distribuisaun tuir pedidu no nesesidade husi HNGV. Nia mós informa katak reazente rua ne’ebé presiza sei tama tan iha semana ida-ne’e.
“Kona-ba plástiku atu halo doasaun raan ne’ebé stock out, ami buka ona solusaun atu rezolve kedas no ami distribui ona. Distribuisaun ne’e depende ba utilizasaun no pedidu ne’ebé sira hato’o mai. Maibé, iha semana ida-ne’e nia laran, reazente rua ne’e sei tama tan,” nia afirma.
Bainhira sasán sira to’o iha INFPM, instituisaun ne’e sei halo distribuisaun kedas iha loron tuirmai, tuir pedidu ne’ebé simu husi instituisaun saúde sira.
Aleinde ne’e, nia hateten ba futuru INFPM sei halo prosesu rekualifikasaun atu hadi’a jestaun aprovizionamentu, tanba prosesu kompras normál bele lori tempu to’o fulan neen.
“Tanba ne’e, ba futuru ami sei halo prosesu rekualifikasaun, tanba ita haree katak prosesu normál mós bele han tempu to’o fulan neen. Iha fulan Dezembru ka Janeiru, ami sei prepara konkursu públiku foun,” nia dehan.
Jornalista : Felicidade Ximenes
Editór : Cancio Xiemenes

