AMB diskute ezbosu logótipu no planu atividade iha reuniaun KKM

BAUKAU, 18 Novembru 2026 (TATOLI)—Autoridade Munisipál Baukau (AMB) diskute ezbosu logótipu instituisaun ne’e iha reuniaun estraordinária Konsellu Konsultivu Munisipál (KKM), ne’ebé hala’o iha Baukau, Kuarta ne’e.
Reuniaun ne’e lidera husi Prezidente Autoridade Munisipál (PAM) Baukau, Veneranda Eurico Lemos Martins, hamutuk ho membru KKM sira, bazeia ba Diploma Ministeriál Nú. 51/2016, 30 Setembru.
“Hakarak halo matéria ida-ne’e sai ofisiál, ami lori mai diskute kle’an liu iha órgaun ida-ne’e, hodi rona hanoin no halo konfirmasaun kona-ba legalidade. Nune’e, rezultadu husi enkontru ohin nian sei haruka ba Ministériu Administrasaun Estatál (MAE) atu halo análize,” Veneranda Lemos hateten iha Salaun Soimali, Vila Nova.
Eis-deputada ne’e esplika katak logótipu ne’ebé aprezenta iha reuniaun ne’e sei ezbosu, la’ós versaun finál. Tanba ne’e, nia konvida membru konsellu sira atu fó-hanoin ne’ebé inovativu, konstrutivu no inkluzivu, nune’e logótipu ne’e bele reflete valór istóriku, kulturál, ekonómiku no sosiál, tuir identidade Baukau, inklui mós aspirasaun ba futuru munisípiu nian.
Aleinde diskute kona-ba logótipu, reuniaun KKM ne’e diskute mós proposta atu ofisializa Loron Fundasaun Baukau, ne’ebé aprezenta husi Prezidente Kámara Komérsiu no Indústria, José Januario dos Reis, ne’ebé ema bolu “Noki”. Proposta ne’e sujere atu selebra loron fundasaun ne’e kada tinan iha 26 Abríl.
Veneranda Lemos informa mós katak grupu komunitáriu husi Baukau sei partisipa iha feira nasionál, nu’udár parte husi komemorasaun Loron Proklamasaun Independénsia, 28 Novembru, ba da-51. Grupu sira-ne’e sei lori produtu lokál, hahán tradisionál no roupa tradisionál atu partisipa no kompete iha eventu nasionál ne’e.
Iha área desportu, juventude desportiva husi Baukau sei partisipa mós iha Festivál Nasionál Desportiva (FND) no Festivál Nasionál Desportu Paralímpiku (FNP), ho modalidade 15, ne’ebé tuir planu sei hala’o iha semana ikus fulan-Novembru tinan ne’e.
Kontestu
Konsellu Konsultivu Munisipál (KKM) iha Timor-Leste funsiona tuir Diploma Ministeriál Nú. 51/2016, loron 30 Setembru, ne’ebé aprova Regulamentu Konsellu Konsultivu Munisipál. Regulamentu ne’e sai baze legál ba funsionamentu KKM, inklui prosesu diskusaun no konsulta kona-ba asuntu sira iha nivel munisipál.
Iha Munisípiu Baukau, hahú halo preparasaun ba komemorasaun Loron Proklamasaun Independénsia, 28 Novembru, inklui organizasaun feira nasionál atu promove produtu lokál. Autoridade Munisipál Baukau informa katak grupu produtór hamutuk 20 sei partisipa iha feira ne’e, ho produtu hanesan hare, batar, fore-mungu, kulinária no artezanatu.
Iha área desportu, Festivál Nasionál Desportu (FND) no Festivál Desportu Paralímpiku (FDP) 2026 sei hala’o husi 29 Novembru to’o 7 Dezembru, ho partisipasaun munisípiu 12, inklui RAEOA no Ataúru.
Tuir informasaun Komisaun Organizadora ne’ebé TATOLI publika iha 17 Novembru 2026, eventu ne’e sei inklui modalidade desportiva hamutuk 13, ho objetivu atu promove moris saudável, partisipasaun sosiedade no koezaun sosiál.
Klik notísia relevante sira iha kraik hodi lee:
- Regulamentu Konsellu Konsultivu Munisipál – Diploma Ministeriál Nú. 51/2016. https://estatal.gov.tl/pt/diplomas-ministeriais/
- Servisu Agrikultura Baukau prepara grupu 20 atu partisipa iha feira 28 Novembru. https://baucau.gov.tl/pt/uncategorized/servisu-agrikultura-baucau-prepara-grupu-20-partisipa-feira-28-novembru/
- Festivál Nasionál Desportu 2026 sei hala’o iha 29 Novembru–07 Dezembru – TATOLI, 17 Novembru 2026. https://tatoli.tl/2026/11/17/festival-nasional-desportu-2026-sei-halao-iha-29-novembru-07-dezembru/
- Komisaun Organizadora no reprezentante munisípiu sira hala’o serimónia rituál kultura ba FND no FDP 2026. https://dili.gov.tl/2026/11/16/𝐊𝐎𝐌𝐈𝐒𝐀𝐔𝐍-𝐎𝐑𝐆𝐀𝐍𝐈𝐙𝐀𝐃𝐎𝐑𝐀-𝐇𝐀𝐌𝐔𝐓𝐔𝐊-𝐇𝐎-𝐑𝐄𝐏𝐑𝐄𝐙𝐄𝐍𝐓𝐀𝐍𝐓𝐄-𝐌𝐔𝐍𝐈𝐒𝐈𝐏𝐈𝐔-𝐒𝐈𝐑𝐀-𝐇𝐀𝐋𝐀’𝐎-𝐒𝐄𝐑𝐈𝐌Ó𝐍𝐈𝐀-𝐑𝐈𝐓𝐔Á𝐋-𝐊𝐔𝐋𝐓𝐔𝐑𝐀/
Jornalista: Natalino Belo
Editór: Xisto Freitas da Piedade

