PAM Baukau: Deklarasaun Xanana motiva feto atu kandidata an ba Prezidente Repúblika

BAUKAU, 18 Novembru 2026 (TATOLI)—Deklarasaun líder nasionál, Xanana Gusmão, ne’ebé hatudu apoiu ba feto atu kandidata ba kargu Prezidente Repúblika iha eleisaun prezidensiál 2027, konsiderada nu’udár motivasaun ba feto sira iha Timor-Leste atu prepara an hodi konkorre iha prosesu demokrátiku ne’e.
Prezidente Autoridade Munisipál (PAM) Baukau, Veneranda Eurico Lemos Martins, hateten katak deklarasaun ne’e loke oportunidade ba feto sira atu hatudu sira-nia kapasidade no brani hamriik kandidata an iha eventu demokrátiku referidu.
“Primeiru-Ministru seidauk hateten ba pesoál A ka sé B, maibé nia hateten de’it ba feto. Nune’e, feto hotu-hotu iha direitu atu prepara sira-nia an ba festa demokrátika ne’ebé sei mai iha 2027,” Veneranda Lemos hateten iha Salaun Soimali, Vila Nova, Kuarta ne’e.
Eis-deputada ne’e hato’o apresiasaun tebes ba Primeiru-Ministru, Kay Rala Xanana Gusmão, ne’ebé hato’o nia hanoin pesoál atu fó apoiu ba feto ida ba Prezidente Repúblika ba mandatu 2027–2031.
Veneranda Lemos lakohi fó komentáriu kona-ba posibilidade atu nia rasik sei kandidata an ba Prezidente Repúblika, tanba, tuir nia, Xanana seidauk temi naran kandidata espesífika.
Maski nune’e, Veneranda nafatin fó prioridade ba responsabilidade servisu nu’udár Prezidente Autoridade Munisipál Baukau no esforsu atu halo Munisípiu Baukau sai ezemplu iha prosesu desentralizasaun.
Kontestu
Eleisaun prezidensiál iha Timor-Leste sei hala’o iha Marsu 2027. Iha 06 Novembru 2026, Primeiru-Ministru Kay Rala Xanana Gusmão, durante komemorasaun Loron Nasionál Feto ba da-50 iha Sentru Konvensaun Dili, afirma katak nia sei fó apoiu pesoál ba feto ida atu kandidata ba kargu Prezidente Repúblika.
Deklarasaun ne’e hato’o iha kontestu diskusaun kona-ba reprezentasaun no partisipasaun feto iha lideransa nasionál. Maski feto sira hetan ona progresu iha reprezentasaun iha instituisaun públika no setór oioin, oportunidade atu asesu ba pozisaun lideransa aas sei nafatin sai dezafiu.
Xanana seidauk temi naran kandidata espesífika, nune’e deklarasaun ne’e la signifika katak nia fó apoiu ba kandidata ida-ne’ebé identifikada ona.
Klik notísia relevante sira iha kraik hodi lee:
- https://tatoli.tl/2026/11/06/pm-xanana-apoia-feto-atu-kandidata-ba-prezidente-republika/
- https://tatoli.tl/2026/11/06/feto-timor-leste-tinan-50-luta-no-sakrifisiu-igualdade-no-inkluzaun-sei-sai-dezafiu/
- https://timor-leste.gov.tl/?lang=en&p=53408&print=1
Jornalista: Natalino Belo
Editór: Xisto Freitas da Piedade

