Top

Reitór UNTL husu dosente sira sai ezemplu di’ak ba estudante

Reitór UNTL, Joviano António da Costa. Imajén TATOLI/Egas Cristóvão.

DILI, 18 Novembru 2026 (TATOLI)—Reitór Universidade Nasionál Timor-Leste (UNTL), Joviano António da Costa, husu dosente sira hotu atu hala’o kna’ar ho responsabilidade, dedikasaun, dignidade, fraternidade no umanidade, hodi sai ezemplu di’ak ba estudante sira no kontribui ba preparasaun jerasaun futura Timor-Leste ne’ebé iha kualidade aas.

Reitór hato’o apelu ne’e atu enkoraja dosente sira mantein personalidade no profisionalizmu iha fatin servisu, hodi hetan respeitu no evita hahalok ne’ebé bele lori risku ba sira-nia an rasik.

Nia subliña katak kontribuisaun, dedikasaun no sakrifísiu dosente sira-nian ba UNTL tenke hetan apresiasaun husi estudante, alumni no komunidade Timor-Leste tomak.

Joviano António da Costa afirma katak maski dalabarak dosente sira konsidera hanesan eroi ne’ebé la hetan rekoñesimentu adekuadu, pelumenus sira labele hetan tratamentu aat, kondenasaun ka insultu husi ema ne’ebé la valoriza sira-nia kontribuisaun.

“Edukasaun mak xave ba dezenvolvimentu, no dosente sira mak sai autór prinsipál iha prosesu edukasaun, liuliu iha nivel ensinu superiór. Responsabilidade ba dezenvolvimentu nasaun nian, indiretamente, maihusi profesór sira, tanba sira mak forma profisionál no ajente dezenvolvimentu iha futuru,” Reitór UNTL, Joviano António da Costa, dehan iha Kampus Sentrál, Kaikoli, Kuarta ne’e.

Nia hatutan katak profisionál sira iha área oioin, hanesan enjeñéiru, doutór, juís, advogadu, jestór, kontabilista, polítiku, sientista no dosente futuru, hotu-hotu liuhusi prosesu formasaun iha universidade.

Tanba ne’e, reitór husu dosente sira atu orgullu ho sira-nia profisaun nu’udár edukadór iha UNTL, tanba liuhusi hanorin, orientasaun no akompañamentu ne’ebé sira fó, bele forma ema matenek no intelektuál sira hodi garante sustentabilidade nasaun Timor-Leste nian iha futuru.

Iha parte seluk, reitór mós husu estudante sira atu orgullu tanba hetan oportunidade atu estuda iha UNTL, konsidera katak la’ós estudante hotu iha Timor-Leste mak iha oportunidade atu asesu ba universidade ne’e.

Nia enkoraja estudante sira atu aproveita didi’ak oportunidade ne’ebé sira hetan, aprende ho seriedade, estuda maka’as no halibur koñesimentu natoon hodi uza ba sira-nia futuru.

Nia mós lembra estudante sira katak susesu ne’ebé sira atinje sai orgullu boot ba dosente sira, no laiha dosente ida mak hakarak haree estudante ne’ebé nia orienta la konsege hetan susesu.

“Prepara imi-nia futuru ho didi’ak hahú husi agora, tanba futuru hahú husi agora. Labele lakon tempu, se lae, imi sei arrepende iha futuru. Estuda, aprende ho imi-nia dosente sira, respeita no dignifika sira, tanba dosente sira mós sai hanesan inan-aman daruak ba imi iha kampus,” nia hato’o.

Reitór mós husu atu kria ambiente kampus ne’ebé seguru, konfortável, saudável no hakmatek, hodi garante kualidade graduadu sira-ne’ebé UNTL forma.

Nia afirma katak prestíjiu UNTL nian sai responsabilidade hamutuk, hodi harii universidade ida ho kualidade aas, transparénsia, inovasaun no kompatibilidade ho nesesidade dezenvolvimentu Timor-Leste no ASEAN.

Aleinde dosente no estudante sira, reitór mós hato’o apresiasaun aas ba funsionáriu UNTL hotu tanba sira-nia kontribuisaun no dedikasaun iha hala’o funsionamentu administrativu universidade nian.

Nia konsidera funsionáriu sira hanesan aliserse importante ba funsionamentu UNTL, tanba sira-nia servisu no kontribuisaun iha papél fundamental atu prepara futuru intelektuál no lideransa ba Repúblika Demokrátika Timor-Leste.

Kontestu

Universidade Nasionál Timor Lorosa’e (UNTL) nu’udár instituisaun ensinu superiór públiku nasionál, iha misaun atu kria, fahe no promove koñesimentu, formasaun kulturál, téknika no sientífika, liuhusi ensinu no investigasaun.

Iha 17 Novembru 2026, Governu liuhusi Ministru Ensinu Superiór, Siénsia no Kultura Interinu, Mariano Assanami Sabino, husu UNTL atu hametin kualidade akadémika, investigasaun sientífika no inovasaun, hodi sai motór dezenvolvimentu nasionál.

Antes ne’e, iha 15 Maiu 2026, Reitór UNTL, Joviano António da Costa, mós destaka nesesidade atu hadi’a rekursu umanu, liuliu kualifikasaun dosente sira, no ekipamentu sala-aula hodi hasa’e kualidade ensinu iha universidade ne’e.

Klik notísia relevante sira iha kraik hodi lee:

  1. https://tatoli.tl/2026/11/17/governu-husu-untl-hametin-kualidade-akademika-no-peskiza-sientifika/
  2. https://tatoli.tl/2026/05/15/reitor-joviano-destaka-pontu-rua-hodi-atinje-kualidade-ensinu-iha-untl/
  3. https://tatoli.tl/2026/11/17/untl-sei-rekruta-dosente-foun-nain-100-atu-substitui-dosente-reformadu/
  4. https://tatoli.tl/2025/05/23/reitor-untl-husu-dosente-sira-la-halo-diskriminasaun-ba-estudante-sira/
  5. https://www.untl.edu.tl/sobre/

Jornalista: Osória Marques

Editór: Xisto Freitas da Piedade

Publisidade

Leave a Reply

Latest Post

error: Content is protected !!