Delegasaun Vikeke kontesta desizaun Komisaun FND kona-ba derrota WO iha basketból

VIKEKE, 18 Novembru 2026 (TATOLI)—Xefe Delegasaun Festivál Nasionál Desportu (FND) Munisípiu Vikeke, Carlos Pinto, kontesta desizaun Komisaun Organizadora FND ne’ebé rejista ekipa basketból Vikeke hetan derrota Walk Over (WO) ho pontu 20 kontra Aileu, iha kompetisaun ne’ebé hala’o iha Dili, 15 Novembru 2026.
Carlos Pinto esplika katak ekipa basketból Vikeke rejista ona atu partisipa iha kompetisaun FND, maibé komisaun elimina ekipa ne’e tanba dokumentu jogadór sira-nian la kompletu. Tanba ne’e, nia konsidera katak situasaun ne’e la’ós derrota WO, maibé desizaun eliminasaun ne’ebé foti husi komisaun organizadora.
“Ha’u hakarak klarifika ba públiku katak, kona-ba eventu FND ne’ebé daudaun hala’o iha Dili, bazeia ba rezultadu jogu modalidade basketból ne’ebé komisaun FND fó-sai foin lalais, iha 15 Novembru, katak Munisípiu Vikeke hetan derrota WO ho pontu 20. Tanba ne’e, ami hakarak fó hatene ba públiku katak Munisípiu Vikeke rejista ona modalidade basketból, maibé komisaun elimina tiha tanba dokumentu la kompletu. Ho nune’e, Munisípiu Vikeke la’ós hetan derrota WO, maibé komisaun FND rasik mak elimina. Ida-ne’e mak ami nu’udar delegasaun hakarak klarifika ba públiku,” Carlos Pinto dehan ba jornalista sira iha Vikeke, Kuarta ne’e.
Xefe delegasaun ne’e reafirma katak nia parte la satisfás ho rezultadu ne’ebé Komisaun FND fó-sai, tanba delegasaun Vikeke rejista ona modalidade basketból, maibé depoizde komisaun halo verifikasaun ba dokumentu, identifika katak dokumentu jogadór sira-nian la kompletu no deside elimina ekipa ne’e iha prosesu tékniku.
“Se WO, signifika katak Vikeke partisipa ona iha prosesu tékniku, maibé la tuir prosesu tékniku ne’e. Maibé ami la’ós WO. Tanba ne’e, ami husu mós ba Komisaun Nasionál FND atu fó klarifikasaun ba públiku, tanba asuntu ne’e sai ona polémika iha mídia sosiál. Iha tempu badak, ha’u mós sei dirije pedidu klarifikasaun ba komisaun FND,” nia hato’o.
Carlos Pinto relata katak delegasaun Munisípiu Vikeke partisipa iha FND iha modalidade desportiva oioin, kompostu husi futeból ekipa feto no mane, futsál ekipa feto no mane, voleiból ekipa feto no mane, atletizmu ekipa feto no mane, boxe amadora ba mane, karaté-do ekipa feto no mane, xadrez ekipa feto, mane, badminton ekipa feto no mane, no ténis de meza ekipa feto no mane.
Kontestu
Festivál Nasionál Desportu (FND) no Festivál Desportu Paralímpiku (FDP) 2026 envolve atleta sira husi munisípiu 12, inklui Rejiaun Administrativa Espesiál Oekusi-Ambenu (RAEOA) no Ataúru, ho modalidade desportiva hamutuk 13.
Eventu ne’e hanesan plataforma nasionál atu fó oportunidade ba atleta sira husi munisípiu hotu-hotu atu hatudu sira-nia kapasidade no kompeténsia iha área desportu, promove kompetisaun saudável no hametin unidade entre juventude Timor-Leste nian. Kompetisaun ne’e inklui modalidade basketból, ne’ebé enkontru tékniku hala’o iha 14 Novembru 2026 no kompetisaun hahú iha 15 Novembru 2026.
Klik notísia relevante sira iha kraik hodi lee:
- https://tatoli.tl/2026/11/17/festival-nasional-desportu-2026-sei-halao-iha-29-novembru-07-dezembru/
- https://tatoli.tl/2026/10/06/mjdak-halo-koordenasaun-ho-entidade-relevante-ba-realizasaun-festival-nasional-desportu/
- https://tatoli.tl/2026/08/24/bobonaru-hahu-prepara-atleta-atu-kompete-iha-fnd-2026/
Jornalista: Vitorino Lopes da Costa
Editór: Xisto Freitas da Piedade

