Profisionál saúde 1.874 hetan promosaun karreira profisionál iha administrasaun públika
DILI, 21 Outubru 2026 (TATOLI)—Konsellu Ministru aprova projetu Dekretu-Lei ne’ebé aprezenta husi Ministra Saúde, Elia dos Reis Amaral, kona-ba Rejime promosaun estraordináriu ba pesoál integradu iha karreira profisionál saúde nian iha Administrasaun Públika ba tinan 2026 hamutuk 1.874.
Dekretu ida-ne’e kontinua rejime promosaun estraordináriu tinan 2025 nian no estabelese vaga 1.874 ba promosaun profisionál saúde sira-ne’ebé la hetan promosaun iha tinan kotuk.
Ministra Saúde, Elia Amaral, hateten katak ohin sira aprezenta tan rezime estraordináriu ida kona-ba karreira profisionál ba pesoál saúde nian, nune’e ho karreira estraordináriu ida-ne’e kompleta liután ba iha faze daruak, ne’ebé aplikante ne’ebé aprovadu hamutuk rihun ida liu.
“Ho promosaun ba pesoál saúde sira-ne’e, sira sei halo destakamentu ba sentru saúde no kliníka sira iha munsípiu. Signifika la’ós atu konsentra de’it iha sentrál maibé mellora atendimentu to’o munisipál,” Ministra saúde ne’e relata ba jornalista iha Palásiu Governu, ohin.
Aleinde ne’e, nia dehan, rejime ne’e kobre médiku, enfermeiru, parteira no mós tékniku diagnóstiku, terapéutika no saúde públika nian, no promosaun prodús efeitu iha loron 01 fulan-Jullu tinan 2026.
“Ho medida ida-ne’e, Governu iha intensaun atu hasa’e valorizasaun no motivasaun ba profisionál saúde sira, promove progresaun karreira no kontribui ba reforsu Servisu Nasionál Saúde nian,” nia dehan.
Jornalista : Alexandra da Costa
Editór : Cancio Ximenes
