Top

Ramos-Horta: Kazu omesídiu agravadu tenke fó pena ne’ebé másimu

Matebian Palomita Gusmao Guterres. Imajen/Espesiál.

DILI, 21 Novembru 2026 TATOLI)—Prezidente Repúblika, José Ramos-Horta, hateten hanesan Xefe Estadu la interven kazu vítima Palomita nia mate, maibé kazu omesídiu agravadu ne’e tenke fó pena ne’ebé másimu tuir Konstituisaun RDTL haruka.

“Ita espera, ita-nia justisa fó pena ne’ebé mak másimu tuir konstituisaun previstu iha ne’eba, tanba kriminozu ne’e hadau tiha joven ida idade 18 nia vida. Ha’u lakohi haree krime ida hanesan ne’e atu halo rekuperasaun. Maibé, ha’u husu ba família vítima hanoin ba kriminozu nia família sira-ne’ebé mak hakfodak terus no moe, tanba sira-nia oan halo hahalok ida-ne’e labele iha odiu vigansa atu hasoru tan justisa. Husik tribunal mak haree ida-ne’e no ha’u sei akompaña ho prokuradór jerál da repúblika no tribunál sira atu aplika justisa todan ne’ebé konstituisaun fó dalan,” Jose Ramos Horta dehan banhira partisipa Misa Requiem ba matebian Palomita Guterres iha Igreja Imaculada Conseição Balide, ohin.

Ramos-Horta lori Prezidénsia Republika no lori Estadu nia naran ho hakruuk hato’o ona sentidu kondoleésia ba família sira, tanba lakon ona joven ida-ne’ebé prepara an ba futuru nian, maibé rai ida -e’e iha demokrátiku, justisa, faternidade, entaun labele soe ida ne’e no labele husik odiu vingansa mak atu manán fali, maibé vitima iha ona lalehan nia lakohi haree família sosiedade no nasaun labele monu nafatin ba violénsia doméstika iha eskola iha servisu fatin no iha uma.

Amo vigariu husi Parokia Balide, Cesar Magno, dehan banhira matebian antes atu hakotu iis hakilar ho lian maka’as katak “Ajuda Ha’u lai”, maibé laiha ajuda ida, nune’e korajen ba matebian nia família liu-liu nia inan-aman.

“Liafuan ida AJUDA HA’U LAI ida-ne’e halo ema hotu fuan moras, tanba liafuan ne’e simples maibé nakonu ho esperansa ba nia belun sira-ne’ebé momentu iha nia sorin,” Padre ne’e hateten.

Nia la husu osan-mean, la husu buat oioin maibé nia husu esperansa hanesan oan nia fizikamente la forsa atu hasoru maibé realidade mai oin seluk.

“Hanesan nia Diretor ida durante tinan haat nia laran ha’u koñese Palomita nia ema ida-ne’ebé mak di’ak iha família uma laran no nia mehi ne’ebé mak aas no sai valór di’ak ba família no sosiedade tomak,” Padre ne’e hateten.

Entertantu, iha Misa Requiem ne’e partisipa másimu husi familia kolega inklui Prezidente Repúblika José Ramos Horta. Bainhira misa ramata familia sira lori ba haloot iha semitériu públiku Becusse.

Jornalista : Felicidade Ximenes

Editór       : Cancio Ximenes

Publisidade

Leave a Reply

Latest Post

error: Content is protected !!