Top

Ohin Governu despede bolseiru 66 kontinua estudu Brazil

Diretór Ezekutivu FDCH, Júlio Aparício. Imajen TATOLI/Francisco Sony

DILI, 21 Novembru 2026 (TATOLI)–Diretór Ezekutivu Fundu Dezenvolvimentu Kapitál Umanu (FDCH), Júlio Aparicio, despede bolseiru hamutuk 66 ne’ebé sei kontinua estudu iha Brazil, iha nivel lisensiatura, mestradu no doutoramentu, husu sira kumpre responsabilidade, ramata estudu tuir prazu no fila mai kontribui ba dezenvolvimentu nasaun.

FDCH servisu hamutuk ona ho ministériu no liña setoriál sira atu identifika nesesidade rekursu umanu iha área ida-idak, nune’e bolseiru sira-ne’ebé remata estudu sei fila mai no integra diretamente iha instituisaun sira ne’ebé presiza profisionál.

“Bolseiru sira-ne’e ba kontinua estudu, ami servisu hamutuk ona ho liña ministeriál sira, tanba bolsa estudu ne’e asina kontratu entre FDCH, liña ministeriál no bolseiru sira. Nune’e, bainhira sira fila mai, direita servisu iha liña ministeriál ne’ebé asina ona kontratu ne’e. Tanba, ita haruka bolseiru sira ba tuir nesesidade kada liña ministeriál iha área oioin,” Júlio Aparicio hateten ba jornalista sira, iha salaun Aeroportu Internasionál Prezidente Nicolau Lobato, Komoro, sábadu ne’e.

Aleinde ne’e, Diretór Ezekutivu FDCH mós apela ba joven sira-ne’ebé sei ramata estudu iha ensinu sekundáriu iha tinan 2026 atu prepara an ho di’ak liuliu hametin domíniu língua Inglés no Portugés, hodi bele kompete ba oportunidade bolsa estudu ne’ebé sei loke iha tinan oin.

Nia afirma, bolsa estudu ne’e uza osan públiku, nune’e joven sira tenke hatudu kompromisu no dedikasaun ba estudu, dezenvolve kapasidade no hametin koñesimentu iha área língua, tanba língua sai kritériu importante ida atu asesu oportunidade bolsa estudu.

Iha parte seluk, nia husu ba diretór eskola sira iha nivel ensinu sekundáriu atu fó atensaun ba estudante sira ne’ebé iha kapasidade akadémika di’ak liuhusi fó apoiu no matéria adisionál, liuliu iha área língua Inglés no Portugés.

Nia konsidera katak estudante balun iha kapasidade no rezultadu akadémiku di’ak maibé dala ruma sira hasoru difikuldade iha área língua, ne’ebé bele sai obstákulu ba sira atu pasa prosesu seleksaun bolsa estudu.

Tanba ne’e, nia husu eskola sira atu hametin preparasaun no apoiu akadémiku ba estudante sira, hodi aumenta sira-nia oportunidade atu kompete no asesu bolsa estudu iha futuru.

Iha fatin hanesan, reprezentante bolseiru, Marcos Da Cruz, hato’o sentimentu orgullu no kompromisu atu uza koñesimentu no kapasidade ne’ebé sira sei hetan durante estudu iha estranjeiru hodi kontribui ba dezenvolvimentu Timor-Leste bainhira remata estudu no fila mai.

“Hetan oportunidade bolsa estudu ne’e hanesan responsabilidade boot, tanba sai mehi ida ba estudante sira atu iha oportunidade kontinua estudu no iha futuru kontribui ba dezenvolvimentu nasaun,” nia dehan.

Nia espera katak durante prosesu estudu, sira sei hetan koñesimentu no esperiénsia iha área espesífika ne’ebé sira hili, atu bainhira fila mai bele aplika koñesimentu ne’e hodi hadi’a no dezenvolve área sira-ne’ebé presiza iha Timor-Leste.

Marcos mós afirma katak estudante sira prontu atu hamutuk servisu no fó kontribuisaun ba rai-doben, tuir kapasidade no área estudu ida-idak, no sei remata sira-nia estudu tuir períodu ne’ebé Governu determina.

Aleinde ne’e, reprezentante bolseiru seluk, Alice Joana da Costa, mós hato’o sentimentu orgullu tanba hetan oportunidade bolsa estudu atu kontinua nia estudu iha nivel mestradu.

Nia kompromete katak hafoin ramata estudu, sei fila hikas mai Timor-Leste hodi hamutuk servisu no kontribui ba dezenvolvimentu nasaun, liuliu iha área ne’ebé nia aprende no dezenvolve durante estudu.

“Oportunidade bolsa estudu ne’e la’ós de’it benefísiu ba dezenvolvimentu pesoál, maibé mós responsabilidade atu fila mai no fó kontribuisaun ba nasaun, hodi realiza mehi hamutuk kona-ba Timor-Leste nia dezenvolvimentu,” nia dehan.

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!