Top

“Joven sira respeitu malu ba, se lae ita-nia rai sai aat liu iha mundu”

Primeiru-Ministru, Kay Rala Xanana Gusmão. Imajen TATOLI/Egas Cristóvão.

DILI, 20 Novembru 2026 (TATOLI)—Primeiru-Ministru, Kay Rala Xanana Gusmão, apela ba joven no estudante sira atu hasa’e dignidade umana, respeita malu no sai matenek hodi kontribui ba dezenvolvimentu rai ida-ne’e nian, relasiona ho kazu omisídiu ne’ebé rezulta joven feto Palomita Gusmão Guterres hakotu iis.

“Joven sira hotu iha Timor-Leste atu hanoin didi’ak ba, hasa’e uitoan imi-nia dignidade umana, respeita malu ba, la’e ita-nia rai sei sai aat liu iha mundu,” Primeiru-Ministru, Kay Rala Xanana Gusmão, dehan ba jornalista sira iha Palásiu Prezidensiál Nicolau Lobato, Bairru Pite, ohin.

Tuir notísia antes ne’e, kazu omisídiu ne’e akontese iha loron 18 Novembru 2026, maizumenus tuku 15h00 lorokraik iha Tasi-Tolu, Aldeia 12 Outubru, Suku Komoro, Postu Administrativu Dom Aleixo, Munisípiu Dili.

Vítima Palomita Gusmão Guterres, estudante husi Dili Institute of Technology (DIT), ne’ebé hetan sona to’o mate. Tuir informasaun preliminár husi PNTL, suspeitu ho inisiál JDRDC deskonfia oho vítima, hafoin entrega an ba autoridade.

Iha loron 19 Novembru 2026, Hospitál Nasionál Guido Valadares halo ona autopsia ba mate-isin matebian nian no entrega ona ba família. PNTL mós kontinua investigasaun durante oras 72 hodi rekolla evidénsia sira kona-ba kazu omesídiu agravadu ne’e.

Primeiru-Ministru hateten, nia ho Prezidente Repúblika halo apela boot tebes ba joven sira atu sai matenek no sai ema ne’ebé koopera di’ak ba dezenvolvimentu rai ida-ne’e, liuliu iha aspetu morál.

“Hanoin, ita sona ema, sona ida sona hanesan ne’e, sona feto kiik-oan oan ida mak hanesan ne’e. Ha’u ho Prezidente Repúblika halo apelu boot tebes, ba joven sira, estudante sira, imi atu sai matenek no atu sai ema ruma ne’ebé koopera di’ak ba dezenvolvimentu rai ida-ne’e, primeiru morál, se la’e susar tebes,” nia hateten.

Jornalista : Hortêncio Sanchez

Editór       : Cancio Ximenes

Publisidade

Leave a Reply

Latest Post

error: Content is protected !!