Top

Prezidente Repúblika simu karta Kredénsia husi Embaixadora foun Austrália mai TL

Prezidente Repúblika, José Ramos-Horta, simu Karta Kredensiál husi Lucienne Olivia Manton, Embaixadora foun husi Austrália ba Repúblika Demokrátika Timor-Leste. Imajen/Mída PR.

DILI, 20 Novembru 2026 (TATOLI)—Prezidente Repúblika, José Ramos-Horta, simu Karta Kredensiál husi Lucienne Olivia Manton, Embaixadora  foun husi Austrália ba Repúblika Demokrátika Timor-Leste.

“Hodi povu Timor-Leste nia naran, ha’u hato’o bemvindu kmanek ba Embaixadora Manton iha Dili. Ha’u hato’o ami-nia apresiasaun kle’an ba Austrália ba ninia parseria no solidariedade,” Prezidente Repúblika, José Ramos-Horta, hateten iha nia diskursu, iha Palásiu Prezidensiál Nicolau Lobato, Bairru Pite, ohin.

Prezidente Repúblika hateten, asinatura husi Kuadru Kooperasaun Defeza no Parseria Foun ba Era Foun marka kapítulu foun ida iha amizade Timor-Leste no Austrália nian.

“Asinatura husi Kuadru Kooperasaun Defeza no Parseria Foun ba Era Foun marka kapítulu foun ida iha ita-nia amizade, ida-ne’ebé harii iha seguransa partillada, prosperidade mútua no ita-nia futuru komún iha rejiaun,” nia hateten.

Nia hatutan, nia hein atu serbisu hamutuk ho Embaixadora Manton hodi hametin liután ligasaun entre nasaun rua ne’e.

“Ha’u hein atu serbisu hamutuk ho Embaixadora Manton hodi hametin liután ligasaun entre ita-nia nasaun rua,” nia dehan.

Perfil Embaixadora foun

Embaixadora Manton mak ofisiál karreira seniór ida ho esperiénsia liu tinan 20 iha Departamentu Negósiu Estranjeiru no Komérsiu Austrália nian (DFAT).

Molok nia nomeasaun, nia serbisu nu’udar Sekretária Adjunta ba Divizaun Ázia Sentrál no Kontinentál Súl DFAT nian. Nia asume ona kna’ar xave sira iha sede DFAT no iha misaun sira iha rai-li’ur Austrália nian, inklui iha Irake, Reinu Unidu, no Afganistaun.

Embaixadora Manton iha lisensiatura iha Arte husi Universidade Melbourne.

Relasaun Timor-Leste – Austrália

Timor-Leste no Austrália estabelese relasaun diplomátika iha 20 Maiu 2002. Austrália nu’udar parseiru kleur ona iha Timor-Leste nia dezenvolvimentu, ho Kooperasaun Ofisiál ba Dezenvolvimentu ne’ebé liu AUD biliaun 1 dezde 1999, inklui AUD millaun 20 hodi fó apoiu ba Timor-Leste nia adezaun no integrasaun ba ASEAN ba tinan 2022-2029.

Relasaun ne’e hametin liután liu husi asinatura Parseria Foun ba Era Foun iha loron 28 Janeiru 2026 no Kuadru Kooperasaun Defeza nian iha loron 21 Outubru 2026, hamutuk ho kompromisu Austrália nian ho maizumenus AUD millaun 62 iha tinan lima nia laran hodi hametin seguransa no reziliénsia Timor-Leste nian.

Programa PALM mós fó benefísiu konkretu, ho remesaun husi partisipante mobilidade traballu Timor-Leste nian liu AUD millaun $104 dezde tinan 2012.

Prezidente Ramos-Horta espresa konfiansa katak Embaixadora Manton sei eleva amizade no kooperasaun entre Timor-Leste no Austrália ba nivel foun durante nia mandatu.

Jornalista : Hortêncio Sanchez

Editór        : Cancio Ximenes

Publisidade

Leave a Reply

Latest Post

error: Content is protected !!