Banku Mandiri reafirma kompromisu atu apoia dijitalizasaun bankária iha TL

DILI, 20 Novembru 2026 (TATOLI)–Jerente Jerál Banku Mandiri Sukursál Dili, Hari Nugroho Sujiono, reafirma kompromisu Banku Mandiri atu kontinua apoia dezenvolvimentu dijitalizasaun bankária iha Timor-Leste inklui integrasaun sistema pagamentu ne’ebé uza kódigu QR entre Timor-Leste no Indonézia.
Jerente Jerál Banku Mandiri Sukursal Dili, Hari Nugroho Sujiono, esplika enkontru ne’e hala’o atu hato’o despedida ba ninia períodu servisu nu’udar Jerente Jerál Banku Mandiri Sukursál Dili, hafoin servisu durante tinan haat no fulan neen iha Timor-Leste.
“Ha’u sei remata ha’u-nia mandatu servisu iha Banku Mandiri Timor-Leste hafoin servisu durante tinan haat no fulan neen iha ne’e. Ha’u hato’o agradese ba apoiu hotu ne’ebé Primeiru-Ministru fó mai ha’u,” Jerente Nugroho Sujiono hato’o kompromisu ne’e ba jornalista sira hafoin hala’o enkontru despedida ho Primeiru-Ministru Timor-Leste, Kay Rala Xanana Gusmão, iha Palásiu Governu, ohin.
Nia mós hateten katak hafoin ramata nia períodu servisu iha Timor-Leste, nia sei kontinua atribuisaun kna’ar foun iha Surabaya, Jawa Timur, Indonézia.
Nia haktuir iha enkontru ne’e, Primeiru-Ministru Xanana Gusmão mós hato’o apresiasaun ba Banku Mandiri tanba bele iha kooperasaun ne’ebé durante ne’e hala’o ho Governu no povu Timor-Leste di’ak tebes.
“Primeiru-Ministru mós hato’o agradesimentu ba ami, Banku Mandiri, tanba kolaborasaun hotu ne’ebé ami hala’o ho Governu no povu Timor-Leste. Hein katak buat hotu ne’ebé ami halo durante ne’e bele kontinua husi ha’u-nia susesór iha tempu oin mai,” nia hateten.
Nia afirma katak mudansa lideransa sei la hamenus kompromisu Banku Mandiri atu fó servisu bankária ba komunidade no apoia dezenvolvimentu setór finanseiru nasionál.
Tuir nia, prioridade ida huisi Banku Mandiri iha futuru mak atu hadi’a servisu bankária dijitál no apoia programa Banku Sentral Timor-Leste (BCTL) atu integra sistema pagamentu ne’ebé bazeia ba kódigu QR ho Indonézia.
“Iha futuru, Banku Mandiri sei kontinua kompromete atu fó servisu di’ak-liu iha Timor-Leste liuliu iha área dijitalizasaun bankária ne’ebé sei kontinua hadi’a,” nia komprometidu.
Tuir nia, Banku Mandiri mós sei apoia implementasaun kooperasaun entre BCTL no Bank Indonesia kona-ba dezenvolvimentu konektividade sistema pagamentu dijitál entre nasaun rua.
“Ami sei apoia programa Banku Sentrál Timor-Leste kona-ba integrasaun QR ho Indonézia, ne’ebé fulan balu liubá mak asinadu ona memorandu entendimentu ho Bank Indonesia,” nia dehan.
Hari fiar katak integrasaun ne’e bele permite kliente banku sira iha Timor-Leste atu halo tranzasaun uza kódigu QR bainhira sira iha Indonézia, no nune’e mós iha direksaun kontráriu.
“Entaun, iha futuru kliente banku sira iha Timor-Leste bele halo tranzasaun QR iha Indonézia. Nune’e mós iha direksaun kontráriu. Ida-ne’e sei aumenta komérsiu no turizmu, liuliu bainhira turista sira hosi Indonézia sosa sasán iha Timor-Leste, sira bele halo tranzasaun iha ne’e,” nia hateten.
Antes ne’e, Bank Indonesia no BCTL asina ona memorandu entendimentu (MoU) iha loron 25 Setembru 2026, iha Jakarta, atu hametin koperasaun iha área sistema pagamentu no inovasaun finanseira dijitál.
Akordu ne’e asinadu hosi Prezidente Bank Indonesia, Destry Damayanti, no Prezidente BCTL, Hélder Lopes, iha programa Festival Ekonomia no Finansa Dijitál Indonézia no Indonesia Fintech Summit and Expo 2026.
Koperasaun ne’e sai nu’udar baze ba nasaun rua atu esplora konektividade sistema pagamentu transfronteirisu, inklui posibilidade implementasaun QRIS Cross-Border, ne’ebé bele fasilita tranzasaun finanseira entre Indonézia no Timor-Leste.
Iha tempu hanesan, bazeia ba informasaun hosi sítu ofisiál Banku Mandiri Dili, banku ne’e hahú operasaun iha Timor-Leste iha 2003 nu’udar sukursál internasionál hosi PT Banku Mandiri (Persero) Tbk.
Durante tinan 22-resin nia operasaun, Banku Mandiri Dili fornese ona servisu no produtu finanseiru oioin ba kliente individuál no emprezáriu liu 40.000 iha Timor-Leste.
Bank Mandiri Dili mós fornese servisu bankáriu dijitál liuhosi aplikasaun Livin’ by Mandiri Timor-Leste, ne’ebé dezenvolve atu atende nesesidade tranzasaun finanseira kliente sira, inklui servisu transferénsia osan no tranzasaun bankáriu seluk.
Aleinde ne’e, Banku Mandiri Sukursál Dili emprega traballadór timoroan hamutuk 100-resin, ne’ebé barak liu rekruta hosi estudante no graduadu sira hosi universidade lokál.
No Hari Nugroho Sujiono rasik hahú kaer kargu nu’udar Jerente Jerál Banku Mandiri Sukursál Dili iha Jullu 2022.
Jornalista : Alexandra da Costa
Editór : Cancio Ximenes

